Burnaǵy kúni Aqmola oblysy, Arshaly aýdanyna qarasty Arnasaı eldi mekeninde erekshe is-shara bolyp ótti. Aýyldaǵy «Vıacheslav» orta mektebi aýmaǵynda «Astana EKSPO-2017» Halyqaralyq kórmesi qurmetine alma aǵashtary otyrǵyzylyp, bolashaq «EKSPO baý-baqshasynyń» negizi qalandy.
2017 jyly Astanada TMD elderiniń ishinde alǵash ret «Bolashaqtyń energııasy» degen taqyryppen «EKSPO-2017» Halyqaralyq mamandandyrylǵan kórmesi ótkiziletindigi belgili. Osyǵan oraı, elimizde aýqymdy sharalar qolǵa alynyp, jahandyq sharany qoldaý, nasıhattaý jumystary júrgizilýde. Búgingi «Vıacheslav» mektebi aýlasynda «EKSPO baý-baqshasynyń» negizin salý da sol keshendi sharalardyń biri. Bul sharanyń taǵy bir ereksheligi, ol Uly Jeńistiń jetpis jyldyǵyna oraılastyryp ótkizilýde. Soǵan baılanysty mektep aýmaǵynda jetpis túp alma aǵashy otyrǵyzyldy. Jemis baǵynyń negizin qalaý rásimi memlekettiń Ánuranymen bastalyp, áskerı bólim jaýyngerleri soǵysta qaza bolǵan jaýyngerler qurmetine arnap, aspanǵa úsh dúrkin oq atý rásimin oryndady.
Keshendi sharany «Astana EKSPO-2017» UK» AQ, «Jasyl» ekonomıkany qoldaý jáne G-Global-dy damytý koalısııasy» ZTB, Ulybrıtanııanyń Qazaqstandaǵy elshiligi, G-GLOBAL Halyqaralyq hatshylyǵy, «Aqbota» QQ jáne «Turaqty damý» jer qory birlese uıymdastyryp otyrǵanyn atap ótý kerek.
Vıacheslav orta mektebin biregeı mekeme dep ataýǵa bolady. Munda oqýshylardyń boıynda birinshi synyptan bastap týǵan jerine, tabıǵatqa degen súıispenshilik tárbıelenedi. Balalar naqty mysaldar arqyly energııany tıimdi paıdalanýǵa úırenip, osyndaı tehnologııalardy qoldanýdyń paıdasyn kórip ósedi. Jeńistiń 70 jyldyǵyna oraı jáne týǵan jerin qorǵaǵan sarbazdardyń qurmetine arnap alma aǵashyn dál osy mektepte otyrǵyzýdyń astarynda úlken mán jatyr. Mekteptiń janynda óz jer telimi jáne jylyjaıy bar. Onyń kúndelikti qyzmetinde ozyq tehnologııalar qoldanady. Munda sýdy jylytý úshin kún batareıalaryn, jaryq dıodty jaryqtandyrýǵa, al jylytý maqsatynda pırolızdik peshti qoldanady. Qazir balalar tamshylatyp sýarý ádisin jáne sý sebýge arnalǵan jańbyrlatqysh saptamalardy qoldanysqa engizip otyr.
«EKSPO baǵyna» jetpis túp alma aǵashyn otyrǵyzý aksııasyna Qazaqstan Respýblıkasy Parlamentiniń depýtattary Serik Nógerbekov, Aıgúl Soloveva, Serik Ospanov, Nadejda Nesterova, Ulybrıtanııanyń Qazaqstandaǵy elshisi Kerolın Braýn, «Astana EKSPO-2017» ulttyq kompanııasynyń basqarýshy dırektory Saltanat Raqymbekova jáne jergilikti tyl ardagerleri, aýyl turǵyndary, jastar uıymdary men buqaralyq aqparat quraldary ókilderi qatysty.
Aksııa barysynda sóz alǵan senator S.Nógerbekov «Astana EKSPO-2017» halyqaralyq kórmesiniń mańyzy men mánin aıtyp, búgingi is-sharaǵa rızalyǵyn jetkizdi. Jetpis túp alma aǵashynyń keleshekte úlken aýmaqty alatyn jetpis myń túp alma aǵashy bar alyp baqqa aınalýyna tilektestik bildirdi. Saltanat Raqymbekova osy aksııany ótkizýge qoldaý kórsetken mektep ujymyna alǵys aıtty. Sondaı-aq, bilim ordasynyń elimizdegi basqa mektepterge úlgi bolatynyna senim bildirdi. Sodan keıin Vıacheslav mektebiniń oqýshylaryna «EKSPO baý-baqshasyn saqtaýshy» degen sertıfıkat saltanatty túrde tabys etildi. Jıyn sońy merekelik konsertke ulasty.
Jaras SADÝAQASOV.
Aqmola oblysy, Arshaly aýdany, Arnasaı aýyly.
Sýrette: «EKSPO baǵynyń» negizin qalaý sharasynan kórinis.