Jambyl oblysynda Fýrmanov aınalma kanaly 40 jyldan keıin alǵash ret mehanıkalyq ádispen tazartylyp jatyr. Sý resýrstary jáne ırrıgasııa mınıstrligi atalǵan jobany Túrkistan oblysynyń Sozaq aýdanyna Shý ózeniniń sýyn tıimdi jetkizý maqsatynda qolǵa alǵan, dep jazady Egemen.kz.
Uzyndyǵy 120 shaqyrymdy quraıtyn, ótkizý múmkindigi sekýndyna 45–50 tekshe metrge jetetin bul kanal Moıynqum aýdanyna qarasty Qylyshbaı, Qumózek, Qarabóget jáne Saryózek aýyldarynyń tusynan ótedi.
Mınıstrlik ókilderiniń málimetinshe, tazalaý jumystary bıyl aıaqtalyp, kanal arqyly sý jiberý qaıta jandanady. Bul Shý ózeninen ekologııalyq maqsatta bólinetin sýdyń tıimdiligin arttyryp, Sozaq aýdanyndaǵy tabıǵı ahýaldy jaqsartýǵa sep bolmaq.
«Sý resýrstary jáne ırrıgasııa mınıstrligi jyl saıyn Tasótkel sý qoımasynan Sozaq aýdanynyń ekojúıesin qoldaý úshin shamamen 200 mln tekshe metr sý jiberedi. Kanaldy tazartý sý jiberýdiń tıimdiligin arttyryp, 40 jyldan beri alǵash ret ony óz maqsatyna saı paıdalanýǵa múmkindik beredi. Sonymen qatar kanal boıyndaǵy eldi mekenderdiń sýǵa qoljetimdiligi jaqsarady. Nysanda júrgizilip jatqan jumystar mınıstrliktiń qatań baqylaýynda», dedi vedomstvo basshysy Nurjan Nurjigitov.
Aıta keteıik, byltyr qyrkúıekten bıylǵy sáýirdiń sońyna deıin Shý ózeni arqyly Sozaq aýdanyna 1,5 mlrd tekshe metrden astam sý jetkizilgen.