Elimizde telefon qurylǵylaryn verıfıkasııalaý qyzmetin birneshe jeke kompanııa atqaratyn boldy. Bul týraly Sıfrlyq damý, ınnovasııalar jáne aeroǵarysh ónerkásibi vıse-mınıstri Dosjan Musalıev málimdedi, dep jazady Egemen.kz.
Onyń aıtýynsha, qurylǵylardy sáıkestendirý júıesin jyldam engizýdiń eń tıimdi joly – jeke sektordy tartý.
«Bul – júıeni iske qosýdaǵy eń jyldam ári ıkemdi ádis. Biz naqty talaptar belgilep, ashyq irikteý júrgizdik. ATS Mediafon KZ kompanııasy sol talaptarǵa birinshi bolyp saı kelip, qyzmetti bastap ketti», dedi vıse-mınıstr Senatta ótken brıfıngte.
Mınıstrlik verıfıkasııa qyzmetin usynatyn kompanııalardy anyqtaý úshin konkýrs nemese tender ótkizbeıdi. Bul salaǵa kez kelgen uıym arnaıy talaptarǵa saı kelgen jaǵdaıda qosyla alady.
«Bul rette eshqandaı monopolııa bolmaıdy. Qazirdiń ózinde eki kompanııa nıet bildirdi. Iаǵnı qyzmetti birneshe uıym atqarady. Sonymen qatar bul jeke tulǵalarǵa qosymsha salmaq salmaıdy. Prosess tek bıznes pen verıfıkasııa operatorlary arasynda júredi», dep naqtylady Dosjan Musalıev.
Aıta keteıik, elimizge 2025 jylǵy 25 naýryzdan keıin ákelingen barlyq telefondar IMEI-kod arqyly mindetti túrde verıfıkasııadan ótýi tıis. Buǵan deıin tirkelgen qurylǵylar avtomatty túrde verıfıkasııalanǵan bolyp sanalady.
Jańa erejege sáıkes, alǵashqy eki aı ishinde kásipkerler bul qyzmetti tegin paıdalana aldy. Al 25 mamyrdan bastap ár qurylǵy úshin 1 AEK kóleminde (2025 jyly – 3932 teńge) tólem tóleýge mindetti.