Energetıka vıse-mınıstri Qudaıbergen Arymbek Qyzylorda oblysyndaǵy munaı-gaz óndirýshi kompanııalarmen keńes ótkizdi. Keńeste óńirdiń gaz qorlaryn ıgerý, óndiristi ulǵaıtý jáne energetıkalyq qaýipsizdikke úles qosý baǵytynda birqatar naqty máseleler qaraldy, dep jazady Egemen.kz.
Qyzylorda oblysynyń gaz resýrstarynyń jalpy áleýeti 22 mlrd tekshe metrden asady. Bul – eldiń energetıkalyq qory úshin aıtarlyqtaı mańyzdy kórsetkish. Sońǵy jyldary óńirde bul baǵyttaǵy jumys jandana bastaǵan. Máselen, 2022 jyly «BK «QazGerMunaı» JShS Ońtústik Aqsaı gazkondensatty ken ornyn óndiristik ıgerýge engizdi. Qazir bul kásiporyn aımaqtyq gaz habyna aınalyp keledi.
2025 jyldyń tamyzyna deıin «Kazpetrol Group» JShS men «Galaz ı Kompanııa» JShS óndirip otyrǵan ilespe munaı gazy «QazGerMunaıdyń» ÝKPG–1,2 qondyrǵysyna jetkizilmek. Al qyrkúıekke qaraı bul qondyrǵyǵa «TuzkólMunaıGaz Opereıtıng» JShS-nyń shıki gazy baǵyttalady.
«PetroQazaqstan Venchers Ink.» kompanııasy gaz qorlaryn ıgerýge túrli tásilder qarastyryp otyr. Atap aıtqanda, «PetroQazaqstan Qumkól Resorsız» AQ-men birlesip Arysqum ken ornynyń gaz shapkasyn ıgerý jobasy boıynsha jumys isteýde. Qazirgi tańda osy ýchaskeni ónerkásiptik turǵyda paıdalanýdyń tehnıkalyq-ekonomıkalyq negizdemesi ázirlenip jatyr.
Sondaı-aq «Torǵaı Petroleým» AQ jylyna 50 mln tekshe metrge deıin gaz qabyldaýǵa jáne ony paıdaǵa asyrýǵa daıyn ekendigin jetkizdi. Vıse-mınıstr Qudaıbergen Arymbek bul kólemdi suıytylǵan tabıǵı gaz (STG) óndirisine baǵyttaý boıynsha áleýetti ınvestorlarmen jumys isteýdi usyndy.
Keńeste «BK «KýatAmlonMýnaı» JShS-nyń 2026 jyldan bastap synaq júrgizýge arnalǵan uńǵymalardy irikteý jónindegi josparlary tanystyryldy. Al «SNPS-Aı Dan Mýnaı» AQ-pen gaz ken oryndaryn ıgerý boıynsha qosymsha kelissózder ótkizý josparlanýda.
Jıyn barysynda Energetıka mınıstrligi men oblys ákimdigi tarapynan áleýmettik-ekonomıkalyq jaýapkershilik máseleleri de kóterildi. Kompanııalar – «KOR Munaı kompanııasy» AQ, «Ken-Aı-Oıl Qyzylorda» JShS, «Krıstall Menedjment» AQ, «Sozak Oil and Gas» AQ, «Turan-Barlaý» JShS jáne basqalar – kelisimsharttyq mindettemelerin oryndaý barysy jáne óńirdiń ınfraqurylymyna qarjylaı úles qosý baǵytyndaǵy jumystary boıynsha esep berdi.
Qudaıbergen Arymbek Qyzylorda oblysynyń gaz áleýeti eldiń energetıkalyq qaýipsizdigin nyǵaıtýǵa, jańa jumys oryndaryn qurýǵa jáne óndiristik ınfraqurylymdy keńeıtýge úlken múmkindik beretinin atap ótti.