ASTANA. 16 aqpan. Almatyǵa Halyqaralyq Olımpıada komıtetiniń baǵalaý komıssııasy kelip, sporttyq bes nysannyń jaǵdaıymen tanysty. Bul týraly egemen.kz tilshisi habarlady.
Atalǵan komıssııa 12 myń adam syıatyn Muzaıdyny saraıyn, Olımpıadanyń ashylýy men jabylýy ótetin Ortalyq stadıondy, «Balýan Sholaq» sport saraıyn, «Suńqar» shańǵymen tuǵyrdan sekirý keshenin jáne Táýelsizdik alańyn aralap kórdi.
Bizdiń taraptan Olımpıadany ótkizýge jaýapty degen azamattardyń aıtýynsha, Almaty búginniń ózinde dúbirli dodany ótkiýge 70-80 paıyz daıyn eken. Al qurylysy júrip jatqan nysandardyń barlyǵy da 2017 jyly sol Almatyda ótetin qysqy Ýnıversıadaǵa deıin tolyǵymen salynyp bitpek.
Sonymen, qalany armansyz aralaǵan komıssııanyń kórgenine kóńili tolǵan sııaqty. Alda-jalda Olımpıada Almatyda óte qalsa, sportshylar men qonaqtar alashapqyn bolmaıdy. Jarys ótetin nysandar bir-birimen búıirlesip-aq jatyr. Dáliregi, olardyń ornalasqan jeri Olımpıada qalashyǵynyń aınalasynan 30 shaqyrymnan aspaıdy eken. Onyń ústine, «Almaty-2022» uıymdastyrý komıssııasynyń vıse-prezıdenti A.Krıýkov Olımpıadanyń bir ǵana qalada – Almatyda ótetinin málimdedi. Qysqy Olımpıadanyń jartysy Astanada ótse degen usynys kún tártibinen túsip qaldy.
Endigi kezek – Beıjińde. HOK-tyq baǵalaý komıssııasy Qytaı astanasynda 24-28 naýryz aralyǵynda bolady. Al qysqy Olımpıadanyń astanasy osy jyldyń 31 shildesinde Kýala-Lýmpýrdaǵy keńeste belgili bolmaq. Ázirge Almaty men Beıjiń bul báıgede úzeńgi qaǵystyryp keledi.
Joldybaı Bazar.
Derek, sýret: egemen.kz.