Májilis tóraǵasy Erlan Qoshanov jýrnalısterge arnalǵan «Parlament sózi» syılyǵynyń ıegerlerine marapattar tabystady. BAQ qyzmetkerleri arasyndaǵy jeńimpazdar jeti atalym boıynsha anyqtaldy.
Saltanatty jıyndy ashqan Erlan Qoshanov «Parlament sózi» syılyǵynyń ıegerleri men BAQ ókilderin kele jatqan kásibı merekesimen quttyqtady.
– Qazir qoǵamdy jýrnalıssiz elestetý múmkin emes. Halyq sizderdiń jazǵan maqalalaryńyz ben sıýjetterińizden elimizdegi jáne álemdegi oqıǵalardan habardar bolyp otyrady. Ásirese Memleket basshysy Qasym-Jomart Kemelulynyń saıası-ekonomıkalyq reformalary men aýqymdy bastamalaryn halyqqa durys túsindirýge mol úles qosyp kelesizder. Sonyń ishinde Parlamentte qabyldanyp jatqan zańdar sizder arqyly nasıhattalyp jatyr. Zańdy qabyldaý bir bólek, ony halyqqa durys jetkizý – ol da negizgi mıssııanyń biri, – dedi Májilis tóraǵasy.
Palata spıkeri búginde Májiliste 700-den asa BAQ ókili akkredıttelgenin atap ótti. Bul tizim ýaqyt ótken saıyn ulǵaıyp keledi. Jýrnalısterdiń jaıly jumys isteýine barlyq jaǵdaı jasalǵan. Depýtattar buqaralyq aqparat quraldarymen túrli formatta belsendi jumys atqaryp jatyr.
– Elimizdiń odan ári damýyn myqty buqaralyq aqparat quraldarynsyz elestetý qıyn. Sondyqtan búginde BAQ-tyń jan-jaqty damýyna qajetti jaǵdaıdyń barlyǵy jasalyp otyr. Sizdermen birge biz jańa salalyq zań qabyldadyq. Ol jýrnalısterdiń quqyqtaryn qorǵaýdy kúsheıtti. Blogerler men basqa da aqparat kózderi búginde BAQ-pen básekelesýge tyrysyp jatyr. Biraq memleket baıypty jýrnalıstıkaǵa suranysty júıeli túrde qalyptastyryp keledi, – dedi E.Qoshanov.
Májilis tóraǵasy «Parlament sózi» syılyǵynyń toǵyzynshy jyl ótkizilip kele jatqanyn aıtty. Osy ýaqyt ishinde 140-qa jýyq adam marapattalǵan. Bıyl baıqaýǵa qatysýǵa 100-den asa ótinim kelip túsken. Tańdaý ońaı bolǵan joq. Nátıjesinde, marapattar bylaı bólindi:
– «Úzdik baspa jarııalanymy úshin» – Zeıin Erǵalıeva («Egemen Qazaqstan» gazeti), Vladıslav Shpakov («Vremıa» gazeti);
– «Úzdik televızııalyq sıýjet úshin» – Asylbek Toıbekov («Jibek joly» telearnasy), Meıramgúl Mádáli («Atameken Business» telearnasy), Álibek Rzabaev (Eýrazııa birinshi arnasy, «Parlament Online» baǵdarlamasy);
– «Úzdik beıne-sýret materıaly úshin» – Almas Jýlýbaev («Astana» telearnasy);
– «Úzdik ınternet jáne radıo materıaly úshin» – Áıgerim Baqpaeva («Baigenews.kz» ınternet portaly), Azamat Tlepov (Qazaq radıosy), Áıgerim Týkýsheva («Kursiv.kz» saıty), Tamara Vaal ( «Vlast.kz» saıty);
– «Arnaıy reportaj» – Irına Álimjanova (Qazaqstan ulttyq arnasy, «Qos palata» baǵdarlamasy), Alına Shashkına («Tengrinews.kz» ınternet portaly), Dáýren Omarov («Adal adam» YouTube arnasy);
– «Parlamenttik jýrnalıstıkany damytýǵa qosqan úlesi úshin» – Erkin Jumataev («Habar» agenttigi), Aleksandr Trýhachev («KTK» telearnasy);
– «Parlament sózi» Arnaıy atalymy – «Azattyq rýhy» saıtynyń jáne «24KZ» telearnasynyń ujymdary.