Jetisý oblysy Polısııa departamentiniń Uıymdasqan qylmysqa qarsy kúres basqarmasy prokýratýramen birlesip, ruqsat qujattarynsyz jumys istegen kompanııanyń zańsyz qyzmetiniń jolyn kesti, dep habarlaıdy Egemen.kz.
Atalǵan kompanııa tústi metaldardy zańsyz jolmen qabyldap, óńdep, ilespe qujattarǵa shyndyqqa janaspaıtyn málimetter engizý arqyly olardy birneshe márte elimizdiń aýmaǵynan shyǵarýǵa árekettengen.
Kásiporyn aýmaǵynda júrgizilgen tintý kezinde shetelge jóneltýge daıyndalǵan 600 tonnadan astam qorǵasyn men 100 tonnadan astam alıýmınıı quımalary, sondaı-aq túrli tústi metall qaldyqtary tárkilendi.
Sondaı-aq metall balqytýǵa arnalǵan jasyryn seh pen zertteý jumystaryn júrgizýge arnalǵan zerthana joıyldy.
Buǵan qosa, nysan aýmaǵynan kóshi-qon zańdaryn buzyp, zańsyz eńbek etip júrgen sheteldik azamattar anyqtalyp, olar tıisti zańnamaǵa sáıkes jaýapkershilikke tartyldy.
Qazirgi tańda bul iske qatysty sotqa deıingi tergep-tekserý jumystary júrgizilip, qylmystyq shemanyń túpkilikti uıymdastyrýshylary anyqtalyp jatyr.