Joǵary aýdıtorlyq palata 2021–2025 jyldarǵa arnalǵan jekeshelendirýdiń keshendi josparyn iske asyrý qarqynyn jedeldetý qajet dep esepteıdi. Bul týraly Palata tóraǵasy Álıhan Smaıylov Parlament palatalarynyń birlesken otyrysynda depýtat saýalyna jaýap bere otyryp málimdedi, dep jazady Egemen.kz.
Onyń aıtýynsha, keshendi jospardyń oryndalýy turaqty baqylaýda. 2025 jyldyń basynda jospar 72%-ǵa oryndalǵan.
«637 nysannyń 460-y jekeshelendirildi nemese taratyldy. Bul – respýblıkalyq, kommýnaldyq menshiktegi nysandar men kvazımemlekettik sektor aktıvteri», dedi Álıhan Smaıylov.
2024 jyly jalpy quny 589 mlrd teńge bolatyn 14 nysan básekelestik ortaǵa berilgen. Onyń ishinde 517 mlrd teńge – «Qazaqtelekom» AQ-nyń Tele2 mobıldi operatory úlesin katarlyq ınvestorǵa satý esebinen túsken.
«Osy somanyń 158 mlrd teńgesi respýblıkalyq bıýdjetke dıvıdendter túrinde aýdaryldy. Budan bólek, atalǵan mámile boıynsha 76 mlrd teńge korporatıvtik tabys salyǵy retinde tólendi. Bul – satylǵan aktıvtiń qaıta baǵalanýy nátıjesinde túsken salyq. Qalǵan qarajat shartqa sáıkes bıyl jáne 2028 jylǵa deıin túsedi», dedi Joǵary aýdıtorlyq palata tóraǵasy.
Onyń aıtýynsha, Keshendi jospardy tolyq oryndaý úshin taǵy 177 nysandy básekelestik ortaǵa berý qajet. Osyǵan baılanysty Joǵary aýdıtorlyq palata bul jumysty jedeldetýdi usynady.