ASTANA. 16 aqpan. Elimiz «О́zbekstan-Túrikmenstan-Iran-Oman» halyqaralyq tranzıttik-kóliktik dálizine qosyldy. Budan elimizdiń tranzıttik áleýeti taǵy áldeneshe artqanyn kóremiz. Bul týraly «QTJ» UK» AQ-tyń baspasóz qyzmeti habarlady.
Iran astanasy – Tegeranda «Ashhabad kelisimine» qatysýshy Oman Sultanaty men Iran, Túrikmenstan, О́zbekstan respýblıkalary ókilderiniń úılestirý keńesiniń otyrysy ótti. Oǵan Qazaqstan delegasııasyn «Qazaqstan temir joly» UK» AQ prezıdenti bastap bardy. Otyrysta Qazaqstan aýmaǵy arqyly Soltústik-Ońtústik, Shyǵys-Batys iri halyqaralyq kólik dálizderiniń ótetindigin baıandaldy. Elimizdiń geografııalyq qolaıly ornalasýy men Eýrazııalyq qurlyqtaǵy múmkindigi pash etildi. Qazaqstannyń strategııalyq damý bastamashylyǵynda eldi kólik-logıstıkalyq habqa aınaldyrý men tranzıttik áleýetin arttyra túsýdiń mańyzy zor. Sondyqtan, Qazaqstan ǵalamdyq eýrazııalyq kólik júıesin damytýǵa mol úles qosyp keledi.
Qytaı ekonomıkasynyń damýyna oraı júk aǵyndaryn Orta Azııa, Iran jáne Parsy shyǵanaǵy elderine baǵyttaý, burynǵy dástúrli teńiz jolynan qurǵaq jer arqyly transqurlyqtyq baǵdarǵa burý qolaıly ekeni baıqalyp otyr. Osyny meńzegen Asqar Mamın óz sózinde, Qazaqstannyń Ashhabad kelisimine qatysýshy eldermen qosyla otyryp, qosymsha júk aǵyndaryn tartý áleýetiniń moldyǵyn atap kórsetti. Máselen, Ashhabad kelisimine qatysýshy elderdiń arasyndaǵy temirjol kóligi arqyly byltyr júk aınalymy 2013 jylmen salystyrǵanda 2,3 mln. tonnaǵa artyp, 10 paıyzǵa ósken. Barlyǵy 25 mln. tonna júkti quraǵan. Onyń 41 paıyzyn osy elderge Qazaqstan aýmaǵy arqyly ótken tranzıttik eksporttyq júkter qurapty.
Buıyrtsa, 2020 jylǵa qaraı Ashhabad kelisimine qatysýshy elder men Qazaqstan arqyly ótetin júkter jylyna 40 mln. tonnaǵa jetkizilýi múmkin. Osyny nyǵarlaǵan delegasııa basshysy Qazaqstannyń «Ashhabad kelisimine» qatysýshy eldermen halyqaralyq kóliktik jáne tranzıttik dálizdi birlesip paıdalanýdan kóp úmit kútip otyrǵandyǵyn jasyrmady. О́z kezeginde, múddeles elderdiń ókilderi Qazaqstannyń halyqaralyq tranzıttik kóliktik dálizdi odan ári damytýǵa qosylýyn quptady.
Nurbaı Elmuratov.
Derek: «QTJ» UK» AQ-tyń baspasóz qyzmeti.
Sýret: egemen.kz.