Aıagóz aýdanynda iri jol-kólik oqıǵasy bolyp, saldarynan tórt adam qaza tapty. Olardyń arasynda Aıagóz garnızonyndaǵy áskerı bólimderdiń birinde boryshyn ótep júrgen sarbaz jáne onyń ata-anasy bar, dep habarlaıdy Egemen.kz.
Qaıǵyly jaǵdaıdy QR Qorǵanys mınıstrliginiń Qurlyq áskerleri qolbasshylyǵy rastady. Resmı málimetke sáıkes, sarbaz ata-anasynyń erip júrýimen qysqa merzimdi demalystan qyzmetine oralǵan. О́kinishke qaraı, jol apaty saldarynan úsheýi de oqıǵa ornynda kóz jumǵan.
«Qurlyq áskerleriniń qolbasshylyǵy 2025 jylǵy 28 maýsymda Aıagóz garnızonyndaǵy áskerı bólimderdiń biriniń merzimdi áskerı qyzmetshisi jáne ony seıildemeden áskerı bólimge alyp kele jatqan ata-anasy jol apaty saldarynan qaza tapqanyn zor kúızelispen habarlaıdy», dep jazylǵan habarlamada. Qorǵanys mınıstrligi marqumdardy jerleý rásimin uıymdastyrý úshin jan-jaqty kómek kórsetiletinin, onyń ishinde máıitterdi tasymaldaýǵa áskerı ushaq bólinetinin málimdedi.Aldyn ala málimetter boıynsha, jol apatyna Toyota Lumiere kóligin tizgindegen 62 jastaǵy júrgizýshiniń qarsy baǵytqa shyǵyp ketýi sebep bolǵan.
«Toyota Lumiere avtokóliginiń júrgizýshisi joldyń qarsy baǵytyna shyǵyp ketip, Toyota Land Cruiser kóligimen soqtyǵysqan. Sonyń saldarynan Toyota Lumiere júrgizýshisi men úsh jolaýshysy oqıǵa ornynda kóz jumdy», dep habarlady oblystyq Polısııa departamenti.
Qazirgi ýaqytta oqıǵaǵa baılanysty sot-medısınalyq saraptamalar taǵaıyndalyp, tergeý amaldary júrgizilip jatyr.