Abaı oblysynda «Taza Qazaqstan» ekologııalyq aksııasy aıasynda tazalyq is-sharalary qarqyndy júrip jatyr. Jaqynda Shúlbi Shıpaly kóli mańynda «Taza jaǵalaý» ekologııalyq aksııasy ótti, dep jazady Egemen.kz.
«Bulaq kórseń kózin ash» deıtin baba támsilin berik ustanatyn Abaı jastary ózen kólderdiń jaǵasyn tazalaýdy qolǵa aldy.
– Is-shara maqsaty – sý aıdyndarynyń jaǵalaýyn jáne el kóp jınalatyn demalys oryndaryn turmystyq qaldyqtan tazartý, halyq arasynda ekologııalyq mádenıetti qalyptastyrý. Bul bastama turǵyndardy ekologııalyq jaýapkershilikke shaqyryp, tabıǵatqa janashyrlyq tanytýǵa septigin tıgizedi. Aksııaǵa jastar uıymdary, stýdentter, eriktiler men belsendi turǵyndar qatysty. Olar ózen-kól jaǵalaýlarynan turmystyq qaldyqtar men plastıkterdi suryptap jınap, qoqysty arnaıy oryndarǵa shyǵardy. Buǵan qosa tabıǵatty qorǵaýǵa úgitteıtin arnaıy paraqshalar taratyldy, – deıdi uıymdastyrýshylar.
Ákimdiktiń málimetine sensek, bıyl kóktemde Abaı oblysynda 35,5 myń tonna qatty turmystyq qaldyqtar polıgonǵa shyǵarylǵan. 2 072 sý aıdyny tazaryp, 88 706 metr aryq pen 144 sýburqaq retke keltirildi. Eldi mekenderdiń aýmaǵyna 46 348 aǵash pen shybyq otyrǵyzyldy. Sonymen qatar «Búkil Qazaqstandyq aǵash otyrǵyzý kúni» aksııasy aıasynda 26 sáýirde Abaı oblysynda qosymsha 23,1 myń túp kóshet egilgen.
Jastar resýrstyq ortalyǵynyń mamany Ersinbek О́rleýbek tazalyq aksııasynyń mán-mańyzyn túsindirip ótti.
– Bul tek bir rettik tazalyq jumysy emes. «Taza Qazaqstan» baǵdarlamasy – turǵyndardyń ekologııalyq jaýapkershiligin arttyryp, qorshaǵan ortaǵa degen kózqarasty ózgertýdi kózdeıdi. Biz tabıǵatty tutynýshy retinde emes, onyń bir bólshegi retinde qabyldaýymyz kerek. Ár azamattyń úlesi – ortaq ıgilikke baǵyttalǵan naqty áreket. Jastardyń belsendiligi men turǵyndardyń qoldaýy bizdi qýantady. Bul – elimizdiń erteńi úshin jasalǵan jarqyn qadam, – deıdi ol.
«Taza Qazaqstan» aksııasy aıasynda ekologııalyq is-sharalar óńirdiń barlyq eldi mekeninde, tipti shalǵaıdaǵy aýyldarǵa deıin jalǵasyn tappaq.
Abaı oblysy