Ásirese bank sektory men qarjylyq tehnologııa salasynda ónim dızaıneriniń róli barǵan saıyn kúsheıip jatyr. Sebebi qarjy – senimge qurylǵan sala, al senim ınterfeısten bastalady. Dızaıner dese, kópshilik onyń tek sýret salyp, túster men shrıfterdi tańdaýmen aınalysatynyn elestetedi. Alaıda ónim dızaıneriniń jumysy áldeqaıda aýqymdy ári strategııalyq mánge ıe. Ol paıdalanýshy tájirıbesin (UX) zerttep, sol negizde ınterfeısti (UI) ázirleıdi. Sonymen qatar tutynýshy minez-qulqy, naryqtaǵy trendter, básekelester, bıznes maqsattar barlyǵy osy mamannyń sheshimderine áser etedi.
Fınteh – eń jaýapty baǵyt
«Wildberries» ónim dızaıneri jáne «Tinkoff» bankiniń jobalarynda jumys istegen Adelına Ýrjanovamen áńgimelestik. Aıtýynsha, qoldanýshy mobıldi bankıngte bir ǵana batyrmany basyp shot ashady nemese aqsha aýdarady. Biraq sol batyrmanyń túsi, formasy, mátini, ornalasýy – ónim dızaıneriniń zertteýi men sheshimine tikeleı baılanysty. Ol sheshimder ádemilik úshin emes, naqty nátıje úshin qabyldanady.
– Fıntehte dızaın tartymdylyǵymen ǵana shektelmeıdi. Ol naqty erejelerge baǵynady: qaýipsizdik, túsiniktilik, zańdylyq. Ár batyrma men ınterfeıs elementi klıenttiń qarjylyq áreketine áser etedi. Sol sebepti, ónim dızaıneri munda tek UX/UI mamany emes, sonymen qatar qarjylyq mádenıetti de biletin, zańmen jumys isteı alatyn, kúrdeli málimetterdi qarapaıym tilmen jetkize biletin sarapshy bolýy kerek. Qarjy salasynda árbir qate – naqty qarjylyq shyǵyn. Sondyqtan kúrdeli termınderdi de túsinikti tilmen usynýǵa tyrysamyz. Bul úderiste UX redaktorlarmen, zańgerlermen tyǵyz jumys isteımiz. Sondaı-aq jaqsy UX ónimniń monetızasııasyna da oń áser etedi. Qoldanýshy ınterfeısti ońaı túsinip, óz áreketin baqylaýda ustaı alsa, aqyly qyzmetterdi paıdalanýǵa da senimmen barady, – deıdi ol.
Ortasha jalaqy – 1 220 000 teńge
«Ronin Studio» negizin qalaǵan jas ónim dızaıneri Qýanysh Amanǵalıdyń sózinshe, ónim dızaıneri – komandadaǵy eń keshendi oılaıtyn maman.
– О́nim dızaıneri jaı sýretshi emes, ol – jartylaı marketolog, jartylaı kásipker, keıde kopıraıter. Iаǵnı ol ádemi etý úshin ǵana emes, paıda ákelý úshin jumys isteıdi. Biz batyrmanyń túsin nemese mátinin kezdeısoq tańdamaımyz – ol sheshimderdiń artynda zertteý, logıka jáne bıznes-maqsat turady. Mysaly, keıde tek tústi ózgertý arqyly-aq qoldanýshylardyń áreket etý deńgeıin 20–30%-ǵa deıin kóterýge bolady, – deıdi Qýanysh.
Onyń aıtýynsha, ónim dızaınynda vızýal mańyzdy bolǵanymen, paıdalanýshy tájirıbesi de ról oınaıdy. Qoldanýshyǵa ónim túsinikti ári yńǵaıly bolmasa, ol ádemi bolǵanymen de paıdalanylmaıdy. «Kolesa Group» zertteýine súıensek, otandyq dızaınerlerdiń 39%-y IT-kompanııalarda, 18%-y qarjy jáne bank sektorynda jumys isteıdi. Bul ónim dızaıneriniń qazirgi naryqta asa qajet ekenin kórsetedi. Eń belsendi óńirler – Almaty (66%) jáne Astana (20%). Dızaınerlerdiń jartysyna jýyǵy – 25 jasqa deıingi jastar. Jalaqy deńgeıi de ónim dızaıneriniń mártebesin aıqyndaıdy. Ortasha jalaqy – 1 220 000 teńge. Grafıkalyq dızaınerlermen salystyrǵanda eki ese joǵary.
– Qarjy sektorynda UX/UI dızaınerlerge degen suranystyń artýy sıfrlyq bankıngtiń damýyna, onlaın tólem júıeleriniń kóbeıýine jáne mobıldi qosymshalar arqyly kórsetiletin qyzmet túrleriniń kúrdelene túsýine tikeleı baılanysty. Ár ónim – kúrdeli júıe, al sol júıeni paıdalanýshyǵa túsinikti etý – ónim dızaıneriniń mindeti. Jahandyq ekonomıkada sıfrly ónimniń tıimdiligi kompanııa tabysynyń sheshýshi faktory bolyp otyr. Al ónim tıimdi bolýy úshin ol qoldanýshyǵa qyzmet etýi kerek. Sol qyzmetti tıimdi qylý ónim dızaıneriniń basty mindeti. Sondyqtan bul mamandyq keleshekte marketıng pen baǵdarlamalaýdan da joǵary suranysqa ıe bolýy múmkin, – deıdi Q.Amanǵalı.
Boljampaz zertteýshi hám strateg
Shynynda, bank qosymshasyn ashqanda, aýdarym jasap nemese shot ashqanda bári «ózi baıaǵydan solaı bolǵandaı» kórinedi. Alaıda sol «ózi bolǵan» úderistiń artynda júzdegen zertteý, synaq, UX test jáne dızaınerlik sheshim tur.
– Qazirgi zamanǵy ónim dızaıneri birneshe baǵytty qatar meńgerýi kerek. Ol – bir jaǵynan paıdalanýshy ne oılap turǵanyn aldyn ala boljaı alatyn zertteýshi bolsa, ekinshi jaǵynan bızneske ne paıdaly ekenin túsinetin strateg. Adamnyń ónimmen qalaı árekettesetinin, qandaı batyrmany qashan basatynyn, nelikten keıde qoldanýdan bas tartatynyn bilýi kerek. Sosyn marketıngti de túsinýi kerek – ol qoldanýshyny qalaı tartýǵa bolatynyn, qaı jerde jarnama tıimdi, mátindi qalaı jazý qajet ekenin bilýge tıis. Sonymen birge analıtıkamen de jumys isteıdi: «Google Analytics» nemese «Hotjar» sekildi quraldar arqyly qaı better jıi qaralatynyn, qaı jerde qoldanýshy toqtap qalatynyn saralaıdy. Bul derekter bolashaq sheshimdi qabyldaýǵa kómektesedi, – deıdi Adelına Ýrjanova.
Paıymdaýymyzsha, tehnıkalyq quraldar da mańyzdy. «Figma», «FigJam», «Miro» sekildi platformalarda erkin jumys isteı alýy qajet. Sebebi qazirgi komandalar – kross-fýnksıonaldy, ıaǵnı bir ónimde dızaıner, baǵdarlamashy, marketolog, analıtık birge jumys isteıdi. Sol kezde báriniń tilin túsinetin dızaıner komanda úshin taptyrmas mamanǵa aınalady.