OPEK-tiń boljamynsha, maýsym aıynda munaıǵa degen álemdik suranys jyldyq mánde táýligine 1,3 mln barrel deńgeıinde saqtalady. Bul ótken aıdyń baǵalaýymen sáıkes keledi deıdi AERC sarapshylary. Suranysty kúsheıtip otyrǵan elder – Qytaı, Úndistan jáne Azııanyń ózge de memleketteri. Bıylǵy munaıdyń jahandyq jalpy suranysy táýligine 105,1 mln barreldi quraıdy eken.
2026 jylǵy álemdik suranystyń ósim boljamy da 1,3 mln barrel deńgeıinde saqtalǵan. Osylaısha, keler jyly munaıdyń jalpy álemdik suranysy táýligine 106,4 mln barrelge jetpek.
«2025–2026 jyldary munaıǵa degen álemdik suranys, negizinen, áýe tasymalyna degen joǵary suranys esebinen kúsheıedi. Sondaı-aq avtomobıl tasymalyna degen suranys ta turaqty saqtalyp otyr. Álemdik suranystyń ósýine Ekonomıkalyq yntymaqtastyq jáne damý uıymyna kirmeıtin elderdegi munaı-hımııa ónerkásibinde jańa qýattardyń paıda bolýy aıtarlyqtaı áser etedi», delinedi AERC sholýynda.
OPEK+ qataryna kirmeıtin elderdegi munaı óndirisin saralaý da mańyzdy. Mundaı ósimniń negizgi draıverleri – AQSh, Brazılııa, Kanada jáne Argentına. 2026 jyly bul elderdegi óndiris kólemi táýligine 0,7 mln barrelge kóbeıedi dep boljanady. Sóıtip, tutyný táýligine 54,7 mln barrelge jetpek.
Bizde mamyrda óndiris táýligine 21 myń barrelge azaıdy. Sonyń ózinde OPEK+ kvotasynan 470 myń barrelge asyp tur.
«OPEK esebine sáıkes mamyrda óndiris sáýirmen salystyrǵanda táýligine 21 myń barrelge azaıyp, táýligine 1,8 mln barrel boldy. Elimizdegi munaı óndirisiniń kólemi keıingi 4 aıda táýligine 1,8 mln barrelge jýyq deńgeıde saqtalyp kele jatyr. Alaıda qańtar-sáýirdegi derekte munaı eksportynyń qundyq kólemi ótken jyldyń osy kezeńimen salystyrǵanda aıtarlyqtaı azaıǵan. Fransııa, Rýmynııa, Qytaı jáne Túrkııa Qazaqstan munaıynyń ımportyn arttyrǵan. Irgeli táýekelder áli de saqtalyp otyr. Sebebi Iran men Izraıl arasyndaǵy qaqtyǵystyń odan ári ýshyǵýy Parsy shyǵanaǵy óńirinen munaı jetkizýdiń buzylýyna alyp kelýi múmkin», deıdi sarapshylar.
Osy faktorlardy eskere kele, mamandar qysqamerzimdi keleshekte Brent markaly munaı baǵasynyń qalypty ósimi jalǵasady dep boljaıdy. Qandaı da bir geosaıası shoktar men syrtqy qysymdar bolmaǵan jaǵdaıda munaı baǵasy barreline 76 dollar mańaıynda turaqtaýy múmkin.