Búgin qazaq poezııasynyń iri ókili, aqyn, jazýshy, qoǵam qaıratkeri Muhtar Shahanovtyń týǵan kúni. 1942 jyly 2 shildede Ońtústik Qazaqstan oblysy, Leńgir aýdanynda dúnıege kelgen Muhtar Shahanov búgin 83 jasqa tolyp otyr, dep jazady Egemen.kz.
Táýelsizdik jyldarynda til men rýhtyń týyn tik ustaǵan sanaýly qaıratkerlerdiń biri – aqyn Muhtar Shahanov. Qazaq qoǵamynda ol ózin tek qalam ıesi retinde ǵana emes, ulttyq qundylyqtardyń qorǵaýshysy, rýh maıdanynyń aldyńǵy shebinde júrgen tulǵa retinde tanyta bildi.
Memleket úshin mańyzy zor birneshe jaýapty laýazymdarda eńbek etken ol – Qazaqstan Parlamenti Májilisiniń depýtaty, sondaı-aq Qyrǵyz Respýblıkasyndaǵy Tótenshe jáne О́kiletti Elshi qyzmetterin abyroımen atqardy.
Aqynnyń shyǵarmashylyq joly da qazaq ádebıetiniń keńistiginde ózindik órnek qaldyrdy. Kóp jyldar boıy «Jalyn» jýrnalyna jetekshilik etip, ádebıettiń jańa býynyna jol ashyp, rýhanı keńistiktiń tynysyn keńeıtýge zor úles qosty.
Muhtar Shahanov – mazmuny tereń, taqyryby aýqymdy, formasy dara týyndylarymen oqyrman júregine jol tapqan aqyn. Onyń «Otyrardyń kúıreýi», «Everestke shyǵý», «Ǵashyqtyq ǵalamaty», «Erkekter jyry», «Sulýlyqty seziný nemese Ǵabıden Mustafınmen qarttyq jaıly áńgime», «12-3=?», «Arman», «Shyń basyndaǵy oqıǵa», «Dostyq ólkesiniń zańy», «Jigerlendirý nemese ózin baqytsyzbyn dep eseptegen jigitke jaýap», «TJ-lar», «Tórt ana», «Kosmopolıt qazaqtar» syndy óleń-dastandary ulttyq poezııanyń mazmundyq-ıdeıalyq kókjıegin keńeıtken shyǵarmalar qatarynda.
Aıta keteıik, Ulytaýda ótken alǵashqy Ulttyq quryltaıda ult rýhanııaty men ádebıetine sińirgen ólsheýsiz eńbegi, sondaı-aq túrki halyqtarynyń rýhanı tutastyǵyn nasıhattaýdaǵy belsendi qyzmeti elenip, Muhtar Shahanovqa Qazaqstannyń Eńbek Eri ataǵy berildi.