«Shymkent – Samara» tas jolynda polıseıler Land Rover kóligin toqtatyp, jolaýshylardyń birinen 400-den astam dozaǵa teń sıntetıkalyq esirtki tárkiledi. Bul týraly Ishki ister mınıstrliginiń resmı ınternet-resýrsy habarlady, dep jazady Egemen.kz.
Túrkistan oblysy Polısııa departamentiniń Esirtki qylmysyna qarsy is-qımyl basqarmasy júrgizgen reıd kezinde Jambyl oblysynyń turǵyny ustaldy. Tekserý barysynda onyń janynan esirtkige uqsas zat salynǵan 30 túıinshek tabylǵan. Jedel saraptama olardyń sıntetıkalyq esirtki ekenin kórsetti. Sarapshylardyń málimetinshe, tárkilengen zattyń salmaǵy 400-den astam bir rettik dozaǵa sáıkes keledi.
Qazirgi ýaqytta atalǵan derek boıynsha tergeý amaldary júrgizilýde. Ustalǵan azamattyń esirtkini qaıdan alǵany jáne ony qaıda jetkizbek bolǵany anyqtalyp otyr.