Qaraǵandy oblysynda quqyq buzýshylyqtyń aldyn alý maqsatynda mektep jáne kolledj oqýshylaryna arnap erekshe ekskýrsııa uıymdastyryldy. Jasóspirimder Abaı aýdanyna qarasty Qarabas aýylyndaǵy túzeý mekemesine baryp, naqty ómir kórinisterimen tanysty, dep jazady Egemen.kz.
Jasóspirimder arasyndaǵy quqyq buzýshylyqtyń aldyn alý baǵytyndaǵy jumystar jalǵasyp jatyr. Polisia.kz málimetinshe, Qaraǵandy oblystyq polısııa departamenti jergilikti polısııa qyzmeti basqarmasy, oblystyq prokýratýra men bilim basqarmasy birlesip, oqýshylar úshin túzeý mekemesine ekskýrsııa uıymdastyrdy. Is-shara Qarabas aýylyndaǵy qylmystyq-atqarý júıesine qarasty arnaıy mekemede ótti.
Túzeý mekemesi kámeletke tolmaǵan kezinde sottalǵan azamattarǵa arnalǵan. Ekskýrsııa kezinde oqýshylar naqty sottalǵan adamdardyń ómir tarıhyn tyńdap, mekemeniń ishki tártibimen tanysty. Atmosfera men shynaıy mysaldar jastarǵa erkindiktiń qadiri men zańdy saqtaý qajettigin sezindirýdi maqsat tutty.
Patrýldik polısııa batalonynyń qyzmetkerleri oqýshylarǵa arnaıy qaýipsizdik sharalarymen qatar, zań buzýshylyqtyń saldary týraly túsindirme jumystaryn júrgizdi. Uıymdastyrýshylardyń aıtýynsha, mundaı áserli kezdesýler jasóspirimderdiń quqyqtyq sanasyn arttyryp, óz bolashaǵyna jaýapkershilikpen qaraýǵa yntalandyrady.
«Maqsatymyz — qorqytý emes. Biz olardyń oılanyp, durys tańdaý jasaýyna jaǵdaı jasaǵymyz keledi», deıdi joba uıymdastyrýshylary.
Ekskýrsııa — óńirde qolǵa alynǵan quqyqtyq tárbıe baǵytyndaǵy jumystardyń biri. Jobany uıymdastyrýshylar bul tájirıbe jasóspirimderge oń áser etedi dep senedi.