Qyzylorda qalasynda búldirshinderdi balabaqshaǵa tasymaldap bara jatqan jeńil kólik avtobýspen soqtyǵysyp, saldarynan birneshe adam jaraqat aldy. Oqıǵa ornynda anyqtalǵandaı, «Chevrolet Cobalt» markaly kóliktiń ishinde balabaqshanyń eki qyzmetkeri men tórt bala bolǵan, dep jazady Egemen.kz.
Jol-kólik oqıǵasy saldarynan eki bala aýyr jaraqat alyp, oblystyq balalar aýrýhanasynyń jansaqtaý bólimine jatqyzyldy. Sondaı-aq balabaqsha tárbıeshisiniń kómekshisi de aýyr hálde aýrýhanaǵa jetkizilgen. Qalǵan eki balaǵa medısınalyq kómek kórsetilip, ambýlatorlyq baqylaýǵa jiberildi.
Oblystyq balalar aýrýhanasy bas dárigeriniń orynbasary Gúlnur О́ksikbaevanyń aıtýynsha, jansaqtaý bólimine túsken eki balanyń háli aýyr ári turaqsyz. Qazirgi ýaqytta dárigerler olardyń ómiri úshin kúresip jatyr.
«Jol-kólik oqıǵasy saldarynan jaraqat bólimine 4 bala kelip tústi. Eki balanyń jaǵdaıy turaqty, olar tolyq tekserýden ótip, ambýlatorlyq em alýǵa jiberildi. Qalǵan eki balany jansaqtaý bólimine jatqyzdyq. Búgingi tańda olar tıisti em qabyldap jatyr. Jaǵdaılary aýyr», dedi Gúlnur О́ksikbaeva.
Quzyrly organdar qazir jol apatynyń naqty sebepteri men mán-jaıyn anyqtaýǵa kiristi.