Elimizde sońǵy bes jylda jaraqat saldarynan bolatyn ólim-jitim 19 paıyzǵa azaıǵan. Bul týraly Densaýlyq saqtaý mınıstrliginiń shtattan tys bas travmatology, akademık N.J. Batpenov atyndaǵy Ulttyq travmatologııa jáne ortopedııa ǵylymı ortalyǵynyń dırektory Oljas Bekarısov Ortalyq kommýnıkasııalar qyzmetinde ótken brıfıngte málim etti, dep jazady Egemen.kz.
Mamannyń aıtýynsha, jaraqattan bolatyn ólim deńgeıiniń eń aıtarlyqtaı tómendeýi Aqmola, Qostanaı, Soltústik Qazaqstan oblystarynda jáne Almaty qalasynda tirkelip otyr – bul óńirlerde kórsetkish 23%-dan 38%-ǵa deıin tómendegen.
2024 jyly elimizde 2,5 mıllıonnan astam adam travmatologııalyq kómekke júgingen. Onyń ishinde 240 myń naýqas stasıonarlyq jaǵdaıda emdelse, 130 myńnan astam operasııa jasalǵan. Solardyń 1 556-sy joǵary tehnologııalyq em-sharalar sanatyna jatady.
Degenmen, sońǵy ýaqytta jol-kólik oqıǵalary saldarynan bolatyn jaraqattar kóbeıip, mamandardyń alańdaýshylyǵyn týǵyzyp otyr. 2024 jyly elimizde 31 myńnan astam jol apaty tirkelgen. Bul – aldyńǵy jylmen salystyrǵanda eki esege jýyq kóp. Jol apattarynyń jartysynan astamy Almaty qalasy men oblysynda, Jambyl, Aqtóbe oblystarynda, Astana men Shymkent qalalarynda bolǵan.
Jyl qorytyndysyna sáıkes jol apattary saldarynan 40 myńnan astam adam zardap shekse, 2 452 adam kóz jumǵan.
Osy rette elimizdiń jedel medısınalyq kómegi damyǵan memlekettermen deńgeıles qyzmet kórsetip otyrǵany atap ótildi. Máselen, 2024 jyly jedel járdem oqıǵa ornyna qalalarda orta eseppen 8 mınýtta, aýyldyq jerlerde 9 mınýtta jetken. Zardap shekkender ortasha eseppen 35 mınýtta aýrýhanaǵa jetkizilgen. Bul – medısınada «altyn saǵat» dep atalatyn kezeń, ıaǵnı ómir men ólim arasyndaǵy sheshýshi ýaqyt.
Akademık Batpenov atyndaǵy Ulttyq ortalyq – elimizdegi travmatologııalyq kómektiń flagmany sanalady. 2024 jyly ortalyqta 11 myńnan astam operasııa jasalsa, sonyń ishinde 1 720 býyn endoprotezdeý, 1 500 omyrtqa hırýrgııasy jáne 2 myńnan astam artroskopııalyq aralasý júrgizilgen. Buǵan qosa, ótken jyly dıagnostıka men emdeýdiń 20 jańa ádisi engizilip, 11 patent alynǵan. 42 ǵylymı maqala, onyń ishinde halyqaralyq resenzııalanatyn basylymdarda jarııalanǵan.
Telemedısına baǵytynda da oń nátıjeler baıqalady – ortalyq mamandary elimizdiń ár túkpirinen 183 naýqasqa saraptamalyq keńes bergen. Sonymen qatar, ortalyq kadr daıarlaý isinde jetekshi orynǵa ıe. 2024 jyly 15 rezıdent oqýdy aıaqtasa, 110 óńirlik maman qaıta daıarlyqtan ótken.
Baspasóz jıyny barysynda Oljas Bekarısov jaraqattyń aldyn alý sharalaryn kúsheıtý, shuǵyl kómekti jańǵyrtý jáne erte ońaltý júıesin damytý qajettigin alǵa tartty. Sonymen qatar, jol-kólik jaraqatyn azaıtý maqsatynda tıisti vedomstvolar arasyndaǵy ózara is-qımyldy kúsheıtýdiń mańyzdylyǵyn atap ótti.