Messendjerler men áleýmettik jelilerde taraǵan «Astana qalasyndaǵy “Álem” saýda ornyna sibir jarasymen aýyrǵan maldyń eti jetkizildi» degen aqparat shyndyqqa sáıkes kelmeıdi. Bul málimetti Veterınarııalyq baqylaý jáne qadaǵalaý komıteti resmı túrde joqqa shyǵardy, dep habarlaıdy Egemen.kz.
Búgingi kúnge deıin elordadaǵy saýda ortalyqtarynda, sonyń ishinde «Álem» saýda ornynda juqpaly aýrýmen aýyrǵan mal eti óniminiń satylýy nemese jetkizilýi týraly eshqandaı fakt tirkelgen joq. Barlyq jetkizilgen et ónimderi mindetti veterınarlyq-sanıtarlyq tekserýden ótedi. Sondyqtan turǵyndardyń alańdaýyna esh negiz joq.
Buǵan deıin biren-saran jaǵdaılar tirkelgen Atbasar aýdanynda keshendi dezınfeksııalyq jumystar tolyq aıaqtaldy. Qaýipti et ónimderi belgilengen sanıtarlyq tártippen joıyldy. Turǵyndar medısınalyq tekserýden ótip jatyr.
Azamattardy tek resmı derekkózderge, ıaǵnı, Aýyl sharýashylyǵy mınıstrligi men Veterınarııalyq baqylaý jáne qadaǵalaý komıtetiniń aqparattaryna senýge shaqyramyz. Jalǵan aqparat taratý Qazaqstan Respýblıkasy zańnamasyna sáıkes jaýapkershilikke ákeletinin eskertemiz.