Májilis depýtattary, «AMANAT» partııasy fraksııasynyń músheleri Arman Qalyqov, Únzıla Shapaq, Qudaıbergen Beksultanov, Baýyrjan Smaǵulov jáne Tilektes Adambekov jumys saparymen Qaraǵandy oblysyna baryp, «Kırov» shahtasynyń eńbek ujymymen kezdesti, dep jazady Egemen.kz.
Qazirgi tańda «Exim Artis» kompanııalar tobyna qarasty shahtada 650-ge jýyq adam jumys isteıdi. Bıylǵy jartyjyldyqta kásiporyn 220 myń tonnadan astam kómir óndirip, jyldyq jospardyń basym bóligin oryndaǵan.
Kezdesý barysynda depýtattar kenshilerge Memleket basshysynyń reformalary men partııanyń saılaýaldy baǵdarlamasy jaıly baıandady. Erekshe nazar aýdarylǵan másele – zııandy ári qaýipti eńbek jaǵdaıynda jumys isteıtin azamattardyń zeınetke erte shyǵý quqyǵy. Baýyrjan Smaǵulovtyń aıtýynsha, 2023 jyldyń basynan beri 15,5 myńnan astam adam arnaıy áleýmettik tólem múmkindigin paıdalanǵan. Onyń 2,5 myńy – Qaraǵandy oblysynyń turǵyndary.
Kenshilermen áńgimede óndiristegi qaýipsizdik pen kásibı aýrýlardyń aldyn alý jaıy da qozǵaldy. Depýtat Qudaıbergen Beksultanov byltyr oblysta Qoǵamdyq densaýlyq saqtaý jáne kásibı densaýlyq ınstıtýtynyń qaıta qurylǵanyn atap ótti. Bul mekeme jarty mıllıonnan astam zııandy óndiriste eńbek etetin azamattardyń densaýlyǵyn qorǵaýǵa baǵyttalǵan ǵylymı jáne praktıkalyq jumystarmen aınalysady.
Aımaqtaǵy óndiristik jaraqat deńgeıi de alańdatarlyq. Bıyldyń ózinde 159 adam zardap shekken. Osyǵan baılanysty Arman Qalyqov eńbek qaýipsizdigin kúsheıtý qajettigin atap ótti.
«Shahtaǵa túsý – kún saıynǵy erlik. Sondyqtan osyndaı kúrdeli jaǵdaıda jumys isteıtin azamattardyń qaýipsizdigi árdaıym Memleket basshysynyń baqylaýynda. Qabyldanǵan zańdar jumysshynyń kinásine qaramastan, apat kezinde tolyq saqtandyrý tólemin alýǵa múmkindik beredi. Al eńbek ınspektorlary qaýipsizdik talaptary buzylǵan jaǵdaıda óndiristi toqtatýǵa quqyly», dedi depýtat.
Kezdesý barysynda kenshiler jas mamandar tapshylyǵy, áleýmettik qoldaý tetikteri men jeńildetilgen ıpotekalyq baǵdarlamalardy keńeıtý qajettigin de alǵa tartty. Depýtattar bul usynystardy nazarǵa alyp, júıeli sheshim qabyldaý úshin Úkimetpen birlesken jumysty jalǵastyrýǵa nıetti ekenderin bildirdi.