Aqmola oblysynda shomylý maýsymy bastalǵaly 12 adam sýǵa ketken, onyń ishinde bir jasóspirim bar. Bul týraly Aqmola oblysy Tótenshe jaǵdaılar departamentiniń azamattyq qorǵanys basqarmasynyń bastyǵy Baqyt Ablanov málimdedi, dep jazady Egemen.kz.
Onyń aıtýynsha, jyl saıyn óńirdegi sý aıdyndarynda shamamen 20 adam qaza tabady. Sýdaǵy qaıǵyly oqıǵalardyń basym bóligi dál osy shomylý kezeńinde tirkeledi.
«Sońǵy úsh jylda shomylý maýsymynda 51 adam kóz jumdy, onyń 19-y kámeletke tolmaǵandar. Bıyldyń ózinde maýsym bastalǵaly beri 12 adam qaza tapty», dedi Bahyt Ablanov.
Sonymen qatar Baqyt Ablanov — alkogoldik mas kúıde shomylý, balalardy qaraýsyz qaldyrý, óz múmkindigin durys baǵalamaý men júzý bilmeý, sondaı-aq ruqsat etilmegen jáne jabdyqtalmaǵan oryndarda sýǵa túsý adam ólimine jıi sebep bolatynyn aıtty.
Aıta keteıik, búginde oblys aýmaǵynda 69 resmı jaǵajaı jumys isteıdi. Sonymen qatar, balalardy júzýge úıretý maqsatynda arnaıy qaýipsiz úıretý oryndary uıymdastyrylǵan.
О́ńirdegi sý aıdyndarynda qaýipsizdikti 99 qutqarýshy qadaǵalaıdy. Olardyń ıeliginde 20 tehnıka jáne 32 júzý quraly bar. Jergilikti atqarýshy organdar jáne quqyq qorǵaý qurylymdarymen birlesip 500-ge jýyq profılaktıkalyq reıd júrgizilgen. Nátıjesinde 47 turǵyn sýdaǵy qaýipsizdik erejelerin buzǵany úshin ákimshilik jaýapkershilikke tartylǵan.