Amsterdam qalasynda M.O.Áýezov atyndaǵy Ádebıet jáne óner ınstıtýty ǵalymdarynyń qazaq jáne túrki álemin zertteýge qatysty eńbekterin tanystyrýǵa arnalǵan «Túrki halyqtary ádebıetin zertteý» atty konferensııa ótti. Atalǵan is-sharany Qazaqstannyń Nıderlandtaǵy elshiligi men «Iýnýs Emre ınstıtýty» túrik mádenıeti ortalyǵy birlese uıymdastyrdy.
Sondaı-aq bul konferensııa M.Áýezov atyndaǵy Ádebıet jáne óner ınstıtýtynda ǴJBM ǴK-niń granttyq qarjylandyrýymen júzege asyrylyp jatqan «Túrki mádenıetindegi Muhtar Áýezov álemi» atty jobasy aıasynda uıymdastyrylǵanyn da aıta keteıik.
Konferensııa barysynda M.Áýezov atyndaǵy Ádebıet jáne óner ınstıtýty men kórnekti qazaq jazýshysynyń murajaı-úıiniń ǵalymdary eýropalyq áriptesterine onshaqty ǵylymı monografııasyn usyndy. Bul ǵylymı monografııalardaǵy zertteýler Muhtar Áýezovtiń buryn-sońdy jarııalanbaǵan, kóp tanystyrylmaǵan eńbekteri men arhıv derekterine negizdelgen. Atap aıtqanda, ǵalym Gúlzııa Piráliniń «Muhtar Áýezov jáne «Manas» eposyn zertteý máseleleri», «Muhtar Áýezov jáne Jambyl» atty tyń málimetter negizinde jazylǵan eńbekterinde manastaný, túrkitaný salalaryna qatysty buryn aıtylmaǵan málimetter bar. Konferensııadan bólek Zıfa-Alýa Áýezovanyń redaktorlyǵymen akademık Kenjehan Matyjanov jáne Gúlzııa Piráli, Dıar Qonaev, Ermek Qanykeı, Saltanat Amantaıqyzy sekildi áýezovtanýshy ǵalymdardyń Muhtar Áýezov pen onyń túrki álemin zertteýdegi róli zerdelengen maqalalary toptastyrylǵan «Literary studies of Turkic. Kazakh and Central Asian perspectives» atty jınaq shyqty. Otandyq ǵalymdardyń bul jınaqtarynan gollandııalyq zertteýshiler túrkologter men ádebıettanýshylardyń KSRO kezinde jáne postkeńestik keńistikte qandaı zertteýlermen aınalysqanymen tanysa alady.