«Taza Qazaqstan» ekologııalyq aksııasy Jambyl oblysynda úzdiksiz jalǵasyp jatyr. Jalpyulttyq sıpat alǵan naýqanǵa barlyq sala ókilderi men qala, aýdan, aýyl turǵyndary úles qosyp, qorshaǵan ortanyń tazalyǵy jolynda jumylǵan judyryqtaı birlik tanytyp otyr.
Aksııaǵa jyl basynan beri óńir basshysy Erbol Qarashókeev bastap, halyq qalaýlylary, zııaly qaýym ókilderi, san salanyń qyzmetkerleri kóp úles qosty. Oblys ortalyǵy Taraz qalasyndaǵy birqatar shaǵyn aýdanda myńdaǵan kóshet otyrǵyzyldy. Birshama ýaqyt buryn Taraz qalasyndaǵy «Áýlıeata» aýdanynyń «Myńbulaq» shaǵyn aýdanynda «Taza aýla» aksııasy uıymdastyryldy. Naýqanǵa jastarmen birge shaǵyn aýdan turǵyndary bir kisideı qatysyp, tazalyq jumysyn júrgizdi.
«Belsendi jastar ekologııalyq aksııaǵa qatysýdan eshqashan bas tartqan emes. Oblys ortalyǵy Taraz qalasynyń muntazdaı taza bolmaýy – bárimizge syn. О́ıtkeni kóne Taraz – elimizdegi jasyl qalalardyń biri. Naýqanǵa shahar turǵyndarynyń kóptep atsalysyp jatqany kóńil qýantady. Jergilikti turǵyndar tabıǵatty aıalaýdy, qorshaǵan ortaǵa qamqorlyqpen qaraýdy ómir saltyna aınaldyrdy. «Taza aýla» aksııasy barysynda turǵyndardyń kóne shahardyń tazalyǵyna jaýapkershilikpen qaraıtynyn aıqyn sezindik. Tazalyq – mádenıettiń, órkenıettiń belgisi. Qala halqy muny jan júregimen túısinip, oblys ortalyǵyn qoqystan tazartýǵa joǵary jaýapkershilikpen atsalysty», dedi Taraz qalalyq jastar resýrstyq ortalyǵy dırektorynyń orynbasary Kamal Turlyhan.
Aptap ystyǵy apshyny qýyratyn jaz mezgiliniń qytymyr minezine qaramastan, Baızaq aýdanynyń halqy Sarykemer aýylyndaǵy Aǵadil Sýhanbaev atyndaǵy saıabaqty qoqystan tazartty. Qordaılyqtar da ekologııalyq aksııaǵa múmkindiginshe úles qosty. Merki aýdanynyń belsendileri taý shatqaldaryna tolyp qalǵan qoqystardy jınady. Turar Rysqulov aýdanynyń azamattary «Jeńis» saıabaǵynda tazalyq jumysyn júrgizdi.
«Tazalyq aýladan bastalady. Árbir adam ózi turatyn óńirdiń tazalyǵyna jaýapkershilikpen qarasa, ekologııalyq mádenıet qalyptasady. «Taza Qazaqstan» ekologııalyq aksııasy barsha azamattyń qorshaǵan ortaǵa qurmetpen qaraýyna sep boldy. Ony kózben kórip júrmiz. Aýdan ortalyǵynyń tazalyǵy bárimizge syn», deıdi Qulan aýylynyń turǵyny Gúláıhan Maratqyzy.
Jergilikti atqarýshy bılik ókilderi keltirgen resmı derekke júginsek, kóktemgi abattandyrý jáne sanıtarlyq tazalyq aılyǵy aıasynda bastalǵan «TazaLike», «Taza aýla» «Taza qala», «Úlgili aýla» baıqaýlary óńirde turaqty túrde ótkizilip jatyr. Baıqaý aıasynda úzdik shyqqandar arnaıy marapattarǵa ıe boldy.
Jalpy, jyl basynan beri Jambyl oblysynda 803,8 myń shaqyrym kanaldar men aryq júıeleri tazartyldy. Sonymen qatar 79,2 myń turǵyn úı aýlalary men 2,7 myń shaqyrym kóshede tazalyq jumysy júrgizildi. О́ńir boıynsha 6,1 myń tonna qoqys shyǵarylyp, 286,9 myń kóshet otyrǵyzyldy. 641,1 myń sharshy metr saıabaq pen gúlzar aýmaǵy tazartyldy.
«Taza Qazaqstan» ekologııalyq aksııasy aıasynda «Jasyl álemdi birge quraıyq» taqyrybymen ekologııalyq aksııa uıymdastyrylǵan bolatyn. Oǵan óńir basshysy E.Qarashókeev bastaǵan laýazymdy tulǵalar qatysty. Aksııaǵa oblys aýmaǵyndaǵy 248 mektepten 10 375 oqýshy laıyqty úles qosty. Oqýshylar túrli taqyryptaǵy baıqaýlarda baq synady. Úzdik shyqqan ozattar óńir basshysynyń qolynan arnaıy baǵaly syılyqtarǵa ıe boldy. Bir sózben aıtqanda, Jambyl oblysynda «Taza Qazaqstan» ekologııalyq naýqany aıasynda qolǵa alynǵan órkendi ister ilki sátke de toqtaǵan emes. Aldaǵy ýaqytta da aýqymdy jumys atqarylmaq.
Jambyl oblysy