Qazaqstan hokkeıshileri – Ýnıversıadanyń kúmis júldegeri

Hokkeıden Qazaqstannyń erler arasyndaǵy  quramasy senbi kúni Ispanııanyń Granada qalasynda Ýnıversıada sheńberinde ótken týrnırde kúmis júldege qol jetkizdi. Bizdiń jastar jarys jabylatyn kúngi aqtyq aıqasta Reseı jasaǵymen kezdesti. Match kútkendegideı, tá­jirıbesi basym, dástúri tereń reseılikterdiń basymdylyǵymen ótti. Olar kezdesýdiń 3-mınýtynda esep ashty. Ony qaq­paǵa Tımýr Shyngareev túsirdi. Al 14-mınýtta Egor Krı­venko alys buryshty dál kózdep, esepti ulǵaıtty. Budan keıin 30-mınýtta Aleksandr Torche­nıýk tablo­daǵy esepti 3:0-ge ulas­tyr­dy. Bizdiń jigitter úshinshi ke­zeńde batyl oınaı bastady. So­nyń nátıjesinde olar 44-mınýt­ta bir shaıbanyń qarymtasyn qaıtara bildi. Munda Renat Safın mergendigimen kózge tústi. Aıta keteıik, Qazaqstannyń stýdentter quramasy munyń aldynda, 2013 jyly ótken qysqy Ýnıversıadanyń da kúmis júldegeri atanyp edi. Sol joly bizdiń komanda Italııanyń Trentıno qalasynda oınalǵan fınaldyq kezdesýde Kanada stýdentterinen 2:6 esebimen utylǵan bolatyn. Al Granadada Ýnıver­sıa­danyń úshinshi orny úshin Kanada jáne Chehııa kezdesti. Bul túnde keshirek oınaldy. Match «Úıeńki japyraǵy» eli hokkeıshileriniń aıqyn basymdylyǵymen bitti. Oıynnyń basynda biraz qarsy­lasqan chehtar sodan keıin oıyn tizginin qarsy­las­ta­ryna birjola berip qoıdy. Ná­tıjesinde 2:6 esebimen utyldy. Al jartylaı fınalda Qazaqstan komandasy osy chehtardy 2:1 etip joldan shyǵaryp tastasa, reseılikter kanadalyqtardy býllıtten 3:2 etip utyp (negizgi ýaqyt – 2:2), aqtyq synǵa joldama alǵan edi. Eske sala keteıik, Ýnıver­sıadada Qazaqstan stýdentteri 11 júlde jeńip aldy. Olardyń qorjyndaryna 5 altyn, 6 kúmis medal tústi. Sportshylar ara­syn­da Anastasııa Slonova Ýnı­ver­sıadanyń eki dúrkin chempıo­ny atandy. Al týrnırde Reseı qura­masy 20 altyn, 18 kúmis jáne 18 qola medalmen koman­da­lyq bi­rinshi oryndy jeńip aldy. Ekin­shi oryndaǵy Koreıa qura­masynda 5 altyn, 9 kúmis jáne 2 qola medal bar. Rýslan IGILIK.