Premer-mınıstr Oljas Bektenov Prezıdent tapsyrmalaryn, onyń ishinde Úkimettiń keńeıtilgen otyrysynda berilgen tapsyrmalaryn oryndaý aıasynda negizgi energetıkalyq jáne aqparattyq-kommýnıkasııalyq jobalardy júzege asyrý máseleleri boıynsha keńes ótkizdi.
«Prezıdent Qasym-Jomart Toqaev Qazaqstannyń elektr energııasymen ózin-ózi tolyq qamtamasyz etýine qol jetkizý jáne rezervterdi qalyptastyrý mindetin qoıdy. Negizgi energetıkalyq jobalardy júzege asyrý – ekonomıkanyń turaqtylyǵyn qamtamasyz etýge baǵyttalǵan strategııalyq mindet. Energojúıeniń turaqty ári boljamdy jumysy ónerkásiptik ósim men óńirlerdiń damýyna negiz bolyp, jańa jobalardyń, onyń ishinde sıfrlyq sheshimder men jasandy ıntellektini engizý baǵytyndaǵy jobalardyń iske qosylýyna jaǵdaı jasaıdy. Jańa qýattardyń belgilengen merzimde iske qosylýyn qamtamasyz etý qajet», dep atap ótti O.Bektenov.
Energetıka mınıstrliginiń derekteri boıynsha qazirgi ýaqytta elimizde 230 elektr stansasy jumys isteıdi, onyń 156-sy jalpy qýaty 3 GVt-tan asatyn jańartylatyn energııa kózderiniń (JEK) obektileri. 2024 jyldyń qorytyndysy boıynsha tutyný kólemi 119,9 mlrd kVt/saǵat bolsa, elektr energııasyn óndirý 117,9 mlrd kVt/saǵatty qurady.
Energetıka mınıstri Erlan Aqkenjenov tapshylyqty jabý jáne qýattardy jańartý úshin 2035 jylǵa deıin qosymsha 26 GVt-tan astam energııa óndirýdi kózdeıtin generasııany damytý boıynsha keshendi baǵdarlama júzege asyrylyp jatqanyn baıandady. Búginde 10 GVt qýat kózin iske qosý jobalary ártúrli kezeńde pysyqtalyp jatyr. Qoldanystaǵy stansalardy jańǵyrtý esebinen taǵy shamamen 5 GVt qamtamasyz etý josparlanǵan.
«Samuryq-Qazyna» qorynyń basqarma tóraǵasy Nurlan Jaqypov Túrkistan oblysynda qýaty 1 GVt bolatyn bý-gaz qondyrǵysynyń qurylysyn salý jónindegi jobanyń júzege asyrylý barysy týraly baıandady. Nysandy TURAN arnaıy ekonomıkalyq aımaǵynyń quramyna engizý josparlanyp otyr.
Batys aımaqtyń energetıkalyq júıesin eldiń Birtutas elektr energetıkalyq júıesimen biriktirý jáne Ońtústik aımaqtyń qýatyn arttyrý jumystary týraly «KEGOC» AQ basqarma tóraǵasy Nábı Aıtjanov baıandady. Prezıdenttiń tapsyrmalaryn oryndaý aıasynda jalpy quny 356 mlrd teńgeden asatyn eki iri bastama júzege asyrylýda.
Uzyndyǵy 600 shaqyrymnan asatyn 500 kV «Qarabatan – О́lke» elektr jetkizý jelisin salý jobasy Atyraý jáne Aqtóbe oblystarynda elektrmen jabdyqtaý sapasyn arttyrýǵa, sondaı-aq batys óńirlerde JEK nysandaryn qosýǵa ınfraqurylymdyq jaǵdaı jasaýǵa baǵyttalǵan.
Ońtústik aımaqtyń elektr jelilerin nyǵaıtý aıasynda uzyndyǵy 475 shaqyrymdy quraıtyn 500 kV «Shý – Jambyl – Shymkent» baǵyty boıynsha elektr jetkizý jelisiniń qurylysy jáne negizgi qosalqy stansalardy jańǵyrtý jumystary júrgizilýde. Barlyq jumysty 2027 jyldyń ortasynda aıaqtaý josparlanǵan.
Jalpy, Ulttyq elektr jelisiniń senimdi jumysyn qamtamasyz etý maqsatynda generasııa qýattaryn salý boıynsha aýqymdy josparlar aıasynda KEGOC jalpy quny 2,3 trln teńge bolatyn 8 iri ınvestısııalyq jobany júzege asyrýdy josparlap otyr.
Sondaı-aq keńes barysynda aqparattyq-kommýnıkasııalyq ınfraqurylymdy damytýǵa baǵyttalǵan jobalar qaraldy. Oljas Bektenov Qazaqstan ekonomıkasyn sıfrlyq transformasııalaý úderisindegi osyndaı bastamalardyń rólin atap ótti.
Sıfrlyq damý, ınnovasııalar jáne aeroǵarysh ónerkásibi mınıstrliginiń málimetinshe, qazirgi ýaqytta Qazaqstanda 6 179 aýyl bar, onyń 42%-y joǵary jyldamdyqty derekterdi taratý tehnologııasymen qamtamasyz etilgen. Aýyldyq eldi mekenderdi shyny-talshyqty baılanys jelilerine (ShTBJ) qosý jobasy aıasynda 2027 jyldyń sońyna deıin ınternet 3 781 aýylǵa jetkiziledi. Nátıjesinde, jeliniń jalpy uzyndyǵy 160 myń shaqyrymnan asady jáne qamtý deńgeıi 90%-ǵa deıin ósedi. Sonymen qatar elimizdiń Eýropa men Azııa arasyndaǵy sıfrlyq tranzıttik hab retindegi rólin nyǵaıtý úshin 2026 jyldyń sońyna deıin eldiń halyqaralyq derekter taratý úlesin arttyrý josparlanyp otyr.
2027 jyldyń sońyna deıin respýblıkalyq jáne oblystyq avtojoldardy qosa alǵanda, el boıynsha kúre joldardy mobıldi baılanyspen qamtý deńgeıin 99%-ǵa deıin jetkizý josparlanýda. Sonymen qatar spýtnıktik baılanysty damytýǵa da basa nazar aýdarylýda: 2025 jyldyń sońyna deıin qosymsha 328 shalǵaıdaǵy eldi meken ınternetke qosylady. Qazirgi ýaqytta Qazaqstan «OneWeb», «Starlink», «Shanghai Spacecom Satellite Technology» jáne «Amazon Kuiper» kompanııalarymen yntymaqtastyq ornatqan. Bul baǵyttaǵy jalpy ınvestısııa kólemi 38,6 mlrd teńgeden asady
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev 2025–2030 jyldar aralyǵynda AKT sektoryna jalpy kólemi shamamen 1,3 trln teńge ınvestısııa tartý josparlanyp otyrǵanyn baıandady. Keńes qorytyndysy boıynsha Premer-mınıstr birqatar tapsyrma berdi.