Aldymyzdaǵy qos mereke – Dombyra jáne Astana kúni qarsańynda Qarasaı aýdanynda erekshe oqıǵa oryn aldy, dep habarlaıdy Egemen.kz.
Aýdan ákiminiń orynbasary Beksultan Aqylbek pen aýdan ákiminiń apparat basshysy Erjas Toqtasynov aýdan basshysynyń atynan aýdandyq perzenthanaǵa arnaıy baryp, sábı súıgen analardy shyn júrekten quttyqtady. Qazaqy dástúrge saı perzenthanaǵa quryqol kelmegen ákimdik qyzmetkerleri ulttyq bolmysymyzdyń sımvolyna aınalǵan dombyra men nárestelerge arnalǵan arnaıy oraý jabdyqtaryn 15 ana men olardyń jańa týǵan sábılerine syıǵa tartyp, zor qýanyshqa bóledi.
«Bul — bolashaq urpaqqa ulttyq óner men dástúrdi sábılik kezeńnen bastap darytýdy kózdegen ıgi bastama», – deıdi quttyqtaýshylar.
Saltanatty sharaǵa aýdandyq ortalyq aýrýhananyń dırektory Almat Chormanov ta qatysyp, jas analar men medısına qyzmetkerlerin merekemen quttyqtap, júrekjardy tilegin jetkizdi.
Shara shymyldyǵyn "Úshqońyr" ulttyq folklorlyq ansambliniń ónerpazdary ashyp, áýelete oryndaǵan ánderimen analardyń kóńilin shattyqqa bóledi.
Bıylǵy jyldyń basynan beri aýdanda 2 916 sábı dúnıege kelse, sońǵy bir aıda 476 náreste ómirge kelgen. Al búgingi tańnyń ózinde 22 bala jaryq dúnıe esigin ashty. Bul — aýdanymyzdyń ósip-órkendeýiniń, jarqyn bolashaǵynyń naqty kórinisi.
Ult bolashaǵy – urpaq tárbıesinen bastalatynyn eskersek, osyndaı ıgi sharalar analarǵa rýhanı demeý ǵana emes, ulttyq qundylyqtardy ulyqtaýdyń jarqyn úlgisi bolmaq.
Almaty oblysy.