Jyl saıyn Alakól kóline qatynaý múmkindikteri jaqsaryp keledi. Bıyl týrıster úshin birqatar jańa kólik baǵyttary iske qosylmaq, dep jazady Egemen.kz.
Solardyń biri – Úsharal áýejaıy men Aqshı aýyly arasynda qatynaıtyn oblys ákimdigi sýbsıdııalaǵan avtobýs marshrýty. Bul bastama – týrısterdiń kópten kútken tileginiń biri bolatyn.
Sońǵy jyldary Úsharal qalasyna qatynaıtyn áýe reısteriniń sany edáýir artty. Qazir Almaty men Astanadan kúndelikti «Almaty–Úsharal» jáne «Astana–Úsharal» baǵyttarynda sýbsıdııalanǵan reıster ushady. Bılet quny – nebári 20 000 teńge. Al jańǵyrtýdan ótken Úsharal áýejaıy iri ushaqtardy qabyldaýǵa qaýqarly. Áýejaı dırektory Aıdyn Baıbazarovtyń aıtýynsha, bul týrıstik maýsymda jolaýshylar aǵyny arta túspek.
Temirjol kóligimen jetýdi qalaıtyndar úshin de múmkindik mol. Bıyl Alakól baǵytyna 13 poıyz qatynaıdy. Olardyń qatarynda Astana men Almatydan shyǵatyn júrdek «Talgo» da bar. Sonymen qatar, О́skemen, Pavlodar, Qyzylorda, Semeı jáne Aqtoǵaı qalalarynan qatynaıtyn baǵyttar qosyldy.
Avtobýs qatynasy da jolǵa qoıylǵan. Almatynyń «Saıran» jáne Taldyqorǵan avtobeketterinen Aqshı men Kóktuma aýyldaryna turaqty avtobýstar júredi. Bılet baǵasy – 5 000-9 000 teńge aralyǵynda.
Alakól aýdanynyń ákimi Almas Ábdınovtyń aıtýynsha, Úsharal áýejaıynan Aqshı aýylyna qatynaıtyn jańa avtobýs baǵyty jýyrda iske qosylady. Qazirgi tańda barlyq konkýrs rásimderi aıaqtalǵan.
Aıta keteıik, buǵan deıin «Taldyqorǵan–Úsharal», «Úsharal–Dostyq» baǵyttaryndaǵy avtojoldar jańartylyp, qoldanysqa berilgen bolatyn. Bul óńir týrızmin damytýǵa úlken serpin berip otyr.