Abaı oblysynyń Semeı qalasynda 4 shilde kúni sý jaǵasynda balyq aýlap otyrǵan jasóspirimge birneshe adam shabýyl jasap, soqqyǵa jyqqan, dep habarlaıdy Egemen.kz.
Zardap shekken bala aýyr jaraqat alyp, birneshe dene jaraqaty men súıek synýy dıagnozymen medısınalyq mekemege jetkizilgen.
Abaı oblysynyń bala quqyqtary jónindegi ýákili Elzıra Soltabaevanyń aıtýynsha, qazirgi tańda QR QK 107-baby (Densaýlyqqa qasaqana ortasha aýyrlyqtaǵy zııan keltirý) boıynsha qylmystyq is qozǵaldy. Sonymen qatar, sot-medısınalyq saraptama taǵaıyndalǵan.
«Men balanyń anasymen baılanystamyn. Qazir olarǵa Psıhologııalyq qoldaý ortalyǵynyń kómegi usynyldy», – dedi óńirlik ombýdsmen Instagram paraqshasynda.
Elzıra Soltabaeva jábirlenýshi tarappen tikeleı baılanysta ekenin, qazirgi ýaqytta balanyń jaǵdaıy baqylaýda ekenin aıtty.
Ol «Mundaı jaǵdaılar balanyń psıhıkasyna aýyr áser etýi múmkin, sondyqtan kásibı psıhologtar kómegi óte mańyzdy» ekenin erekshe atap ótti.