Sý resýrstary jáne ırrıgasııa mınıstrliginiń jumys toby Túrkistan oblysynyń Jetisaı aýdanynda sýarý sýyn paıdalaný erejeleriniń 65 buzýshylyq deregin tirkedi. Bul týraly vedomstvo basshysy Nurjan Nurjigitovtiń qatysýymen ótken keńeste belgili boldy. Jınalys aımaqta sýdyń «kóleńkeli naryǵyna» qarsy kúres sharalaryn talqylaýǵa arnalǵan, dep habarlaıdy Egemen.kz.
Mınıstrliiktiń habarlaýynsha, anyqtalǵan 65 zańbuzýshylyqtyń 61-i – sý jetkizýshiniń kelisiminsiz sý kóp qajet etetin daqyldardy egýge baılanysty. Taǵy 3 jaǵdaıda kúrish alqaptary kelisimshartsyz sýarylǵan. Bul faktiler sýdy paıdalaný tártibin óreskel buzý bolyp esepteledi.
Jıynda sý salasyndaǵy quqyq buzýshylyqtardy anyqtaý boıynsha mınıstrlik qurǵan monıtorıngtik toptardyń jumysy týraly esep tyńdalǵan. Sý resýrstary mınıstrligi men quqyq qorǵaý organdary birlesip áreket etýge kelisken.
«Memleket basshysynyń sýdyń «kóleńkeli naryǵyn» joıý jónindegi tapsyrmasyn iske asyrý maqsatynda mınıstrlik birqatar shara qabyldady. Sý nysandaryn turaqty baqylaýmen aınalysatyn tórt jumys toby quryldy, sý zańnamasyn buzǵany úshin jaýapkershilik kúsheıtilip, sýarý sýyn paıdalaný erejeleri qabyldandy. Quqyq qorǵaý organdary sýarý sýyn ádil bólý men ony zańsyz paıdalanýǵa qarsy kúreste mańyzdy ról atqarady. Monıtorıngtik toptardyń quramyna quqyq qorǵaý organdary ókilderin qosý olardyń tıimdiligin arttyrady», dedi Sý resýrstary jáne ırrıgasııa mınıstri Nurjan Nurjigitov.
Aıta keteıik, 2025 jyldyń 10 maýsymynan bastap sýarý sýyn paıdalaný erejeleri zańdy kúshine engen bolatyn. Jańa tártipke sáıkes:
Kelisimshartsyz sý tutynǵandar – tarıftiń eki eselengen mólsherinde aıyppul tóleıdi; Sý jetkizýshiniń kelisiminsiz daqyl túrin ózgertkender – tarıftiń 1,5 eselengen mólsherinde aıyppul arqalaıdy.Sonymen qatar, jańa Sý kodeksi kúshine endi. Qujatqa sáıkes, basseındik ınspeksııalarǵa jedel áreket etý jáne qadaǵalaý fýnksııalary berildi. Sý salasyndaǵy zańbuzýshylyqtar úshin jaýapkershilikti kúsheıtetin ózgerister Ákimshilik quqyq buzýshylyqtar kodeksine de engizildi.