Amerıkalyq Axios basylymynyń habarlaýynsha, Tegeran ıadrolyq baǵdarlamasyn qaıta jalǵastyrýǵa árekettense, Izraıl Iranǵa qaıta soqqy berýge ázirlenýde, dep jazady Egemen.kz.
Jaqynda Vashıngtonda bolǵan Izraıl premer-mınıstriniń keńesshisi Ron Dermer Izraıldiń joǵary laýazymdy sheneýnikterine AQSh prezıdenti Donald Tramp «belgili bir sharttarmen» Iranǵa jańa soqqy berýdi maquldaýy múmkin ekenin aıtty.
Izraıl 13 maýsymnan beri Iranǵa soqqy berip, ıadrolyq nysandardy, joǵary laýazymdy áskerı sheneýnikterdi jáne ıadrolyq ǵalymdardy nysanaǵa alyp jatyr. Iran buǵan jaýap retinde Izraılge zymyrandar men ushqyshsyz ushaqtar ushyrǵan.
Endi Tegeran tarapy Izraıl men Amerıkanyń bombalaýynan búlingen Fordo, Natanz jáne Isfahandaǵy Irannyń ıadrolyq nysandarynan joǵary baıytylǵan ýrandy shyǵarý qareketinde bolýy yqtımal. Al Izraıl osyǵan jaýap qatpaq.
Buǵan deıin Tramp AQSh-tyń soqqylary Irannyń ıadrolyq baǵdarlamasyn tolyǵymen joıdy dep málimdegen edi. Aıta keteıik, AQSh 22 maýsymǵa qaraǵan túni Fordo, Natanz jáne Isfahandaǵy ıadrolyq nysandarǵa zymyrandar men býnker bombalarymen soqqy berip, qaqtyǵysqa kirisken. Eki kúnnen keıin Iran aldyn ala eskertý jasap, Qatardaǵy AQSh áskerı bazasyna shabýyl jasady. 24 maýsymda Izraıl men Iran AQSh-tyń qysymymen atysty toqtatýǵa kelisti.