QR Densaýlyq saqtaý mınıstrligi el azamattary úshin dárilik zattardyń qoljetimdiligin arttyrý baǵytyndaǵy júıeli jumysyn jalǵastyryp keledi. Atalǵan jumystyń aıasynda mınıstrlik «Hımfarm» AQ, «Johnson & Johnson Kazakhstan» JShS jáne «AstraZeneka Qazaqstan» JShS syndy jetekshi farmasevtıkalyq kompanııalarmen yntymaqtastyq týraly memorandýmdarǵa qol qoıdy, dep habarlaıdy Egemen.kz.
Kelisimder sheńberinde birqatar joǵary suranysqa ıe jáne áleýmettik mańyzy bar dári-dármekterdiń baǵasyn tómendetý kózdelgen.
«Jetekshi otandyq jáne sheteldik farmasevtıkalyq kompanııalarmen memorandýmdar jasasý bizdiń syndarly ózara is-qımyl men áleýmettik jaýapkershilikke jalpy daıyndyǵymyzdy kórsetedi. Mundaı bastamalar farmasevtıkalyq naryqtaǵy turaqtylyqty nyǵaıtýǵa, pasıentterdiń qazirgi zamanǵy preparattarǵa qoljetimdiligin keńeıtýge, sondaı-aq ınvestısııalyq ahýaldy damytýǵa jáne óndiristi oqshaýlaýǵa yqpal etetinine senimdimiz», dedi Densaýlyq saqtaý mınıstri Aqmaral Álnazarova. Sonymen qatar kelisim aıasynda «AstraZeneka Qazaqstan» kompanııasy bólshek jáne kóterme saýda naryǵy úshin birqatar ómirlik mańyzdy dárilik zattardyń baǵasyn tómendetýdi josparlap otyr. «Biz ınnovasııalyq terapııaǵa muqtaj adamdardyń qazirgi ekonomıkalyq jaǵdaıdaǵy qajetti preparattarǵa qol jetkizýin qamtamasyz etý úshin densaýlyq saqtaý mınıstrligimen tyǵyz jumys isteýge nıettimiz. Memorandýmnyń erejeleri bizdiń kompanııanyń Qazaqstan aýmaǵynda lokalızasııalanǵan jáne óndirilgen preparattaryna da qoldanylady. Bizdiń baǵalaýymyz boıynsha, baǵanyń tómendeýi birneshe mıllıon pasıentti qoldaýǵa múmkindik beredi», dedi Qazaqstandaǵy «AstraZeneka» kompanııasynyń memlekettik organdarmen jumys jáne syrtqy kommýnıkasııalar jónindegi dırektory Arsen Nasyrhanov. Mınıstrliktiń habarlaýynsha, «Johnson & Johnson Kazakhstan» kompanııasymen jasalǵan memorandým sheńberinde julyn bulshyqet atrofııasyn emdeýde qoldanylatyn Spınraza (Nýsınersen) preparatynyń baǵasyn qaıta qaraý jóninde kelisimge qol jetkizilgen. Atalǵan aýrý sırek kezdesetin, alaıda ómirge qaýip tóndiretin jáne progressııasy joǵary aýrýlar qataryna jatady. Áleýmettik mańyzy bar dári-dármekterge baǵanyń tómendeýi bir jaǵynan memlekettik bıýdjet shyǵyndaryn ońtaılandyrýǵa múmkindik berse, ekinshi jaǵynan – joǵary qundy terapııaǵa muqtaj naýqastarǵa turaqty dárilik qoljetimdilikti qamtamasyz etedi. «Taǵy bir mańyzdy kelisim otandyq «Hımfarm» AQ kompanııasymen jasalǵan. Kompanııa 2 tıpti qant dıabetin emdeýde qoldanylatyn Dapaglıflozın preparatynyń satyp alý baǵasyn tómendetýge daıyn ekenin bildirgen. Bul – álemdegi eń keń taralǵan ınfeksııalyq emes aýrýlardyń biri. Búginde Qazaqstanda 520 myńnan astam azamat qant dıabetimen tirkelgen, onyń 492 335-i – 2 tıpti dıabetpen aýyrady. Atalǵan dert júrek-qan tamyrlary aýrýlarynyń, kórý qabiletin joǵaltý, búırek jetkiliksizdigi jáne ózge de kúrdeli asqynýlardyń negizgi sebebi bolyp tabylady. Bul áleýmettik-ekonomıkalyq turǵydan da memleketke edáýir júkteme túsiredi», delingen habarlamada. Memorandýmdarǵa kelesideı mańyzdy baǵyttar engizildi: Ruqsat etilgen saýda ústemelerin saqtaý; Dári-dármek baǵasynyń dınamıkasyn baqylaý; Úzdik halyqaralyq tájirıbemen almasý; Innovasııalyq preparattardy qarjylandyrý tetikterin damytý; Dárilik qamtamasyz etý salasyndaǵy zańnamany jetildirý jóninde usynystar ázirleý.