Májilis depýtattary, «AMANAT» partııasy fraksııasynyń músheleri Aıdos Sarym men Sergeı Ponomarev Almaty qalasy Naýryzbaı aýdanyndaǵy sý tartý jáne sý tazartý qondyrǵysynyń qurylysymen tanysty, dep habarlaıdy Egemen.kz.
Strategııalyq nysan partııanyń 2023-2027 jyldarǵa arnalǵan saılaýaldy baǵdarlamasy aıasynda júzege asyrylýda. Joba Naýryzbaı aýdany men Almaty oblysyna qarasty Qarasaı aýdanynyń birqatar eldi mekenin sapaly aýyzsýmen qamtamasyz etýge baǵyttalǵan. Qurylysy bıyl qarasha aıynda aıaqtalady dep josparlanǵan.
– О́zderińiz bilesizder, Naýryzbaı aýdany – Almatyǵa jańadan qosylǵan, qazir belsendi damyp jatqan óńir. Oǵan irgeles jatqan Qarasaı aýdanynyń turǵyndary da osy aýmaqqa qaraı bet buryp jatyr. Bul nysan — jalpy sany 100 myńnan astam adamnyń aýyzsý máselesin sheshetin mańyzdy kásiporyn. Injenerlerdiń aıtýynsha, qurylystyń 85 paıyzy aıaqtalǵan. Negizgi ǵımarattar turǵyzyldy. Eger josparlanǵan merzimde aıaqtalsa, jeltoqsan aıynda turǵyndar taza sý tutynýǵa múmkindik alady, – dedi A.Sarym.
Depýtat Sergeı Ponomarev tabıǵı resýrstardy saqtaý men tıimdi paıdalanýǵa úlken mán berý qajettigin atap ótti. Sý tartý stansııasy tabıǵaty kórkem Aqsaı shatqalynda ornalasqan. Aqsaı ózeni – Almatynyń eń taza sý kózderiniń biri. Sonymen qatar depýtat jobanyń sapasyna, bıýdjet qarjysynyń tıimdi ıgerilýine jáne merdiger jumysyna jeke baqylaý júrgiziletinin aıtty.
– Munda ónerkásip oryndary joq, sýdyń sapasy óte joǵary. Bul joba – ekologııalyq jaýapkershiliktiń de jarqyn mysaly. Biz áli de tabıǵattyń bergenin erkin paıdalanyp júrmiz. Sondyqtan osy baılyqty qadirlep, únemdeýimiz kerek. Qazir ózen laılanyp tur. Tómengi aımaqtardaǵy turǵyndar sýmen qamtylmaı otyr. Sebebi qoldanystaǵy júıeler júktemege tótep bere almaıdy. Biraq jańa sý tartý stansııasy iske qosylǵan soń bul túıtkil túbegeıli sheshiledi. Qarashadan bastap taza sý keledi, – dedi S.Ponomarev.
Depýtattar qurylys barysyn tekserip, merdiger uıymdardyń esepterin tyńdady, qarajattyń ıgerilýi men ekologııalyq qaýipsizdik máselelerin talqylady. Aıta ketý kerek, nysan Ile-Alataý memlekettik ulttyq parkiniń quramyna kiretin Aqsaı orman sharýashylyǵynyń aýmaǵynda ornalasqan. Sý stansııasy iske qosylǵannan keıin 70–80 turaqty jumys orny ashylady. Onyń ishinde sýdyń sapasyn baqylaıtyn zerthana da bolady. Bul óz kezeginde aýdannyń áleýmettik-ekonomıkalyq damýyna yqpal etedi.