Astanadaǵy qylmystyq ister jónindegi mamandandyrylǵan aýdanaralyq sotta 73,5 mıllıon teńge kólemindegi para isine qatysty úkim jarııalandy. Sot úsh adamdy J., K. jáne O.-ny kináli dep tanydy, dep habarlaıdy Egemen.kz.
2024 jyldyń qyrkúıek-qazan aılarynda JShS quryltaıshysy K. memlekettik saraptamadan oń qorytyndy alý úshin deldal O. arqyly respýblıkalyq memlekettik kásiporyn fılıalynyń dırektory J.-ǵa para bergen. Jalpy talap etilgen soma 73,5 mıllıon teńge. Sonyń ishinde 12,2 mıllıony naqty berilgen.
Aıyptaýshy tarap kúdiktilerdiń kinásin K.-nyń ózi bergen jaýaptarmen, kýágerlerdiń sózderimen jáne saraptama qorytyndylarymen dáleldedi. Prokýror aıyptaýdy qoldady. Al aıyptalýshylar óz kinásin moıyndaǵan joq, qorǵaýshylar olardy aqtaýdy surady.
Sot ár aıyptalýshyǵa bólek jaza taǵaıyndady:
J. – 11 jylǵa bas bostandyǵynan aıyryldy (asa iri kólemde para alý);
K. – 8 jylǵa sottaldy (para berý);
O. – 1 jyl 6 aıǵa bas bostandyǵynan aıyryldy (deldaldyq jasaý).
Barlyq sottalýshy ómir boıyna memlekettik qyzmette jumys isteý quqyǵynan aıyryldy. Olardyń jazasyn jeńildetetin jaǵdaı retinde — kámeletke tolmaǵan balalarynyń bary eskerildi. Jaýapkershilikti aýyrlatatyn mán-jaılar anyqtalǵan joq.
Úkim ázirge zańdy kúshine engen joq.