Aqmola oblysynda montaj jumysy kezinde eki adam qaza taýyp, taǵy ekeýi aýrýhanaǵa jetkizildi, dep habarlaıdy Egemen.kz.
Oblystyq Polısııa departamentiniń málimetinshe, 6 shilde kúni Selınograd aýdanyna qarasty Qaraótkel aýylynda sý qubyry jelisinde montajdaý jumysy júrgizilip jatqan kezde qudyq ishinde qaıǵyly oqıǵa boldy. Eki jumysshy qaza taýyp, taǵy eki adam aýrýhanaǵa jetkizilgen.
Atalǵan fakti boıynsha Qylmystyq kodekstiń 156-baby 4-bóligi («Eńbekti qorǵaý qaǵıdalaryn buzý») boıynsha sotqa deıingi tergeý bastaldy. Sot-medısınalyq saraptamalar taǵaıyndaldy. Sonymen qatar, memlekettik eńbek ınspektory tekserý júrgizip jatyr.
«Polısııa departamenti jumys berýshilerge eńbek qaýipsizdigi boıynsha turaqty nusqama ótkizip, qyzmetkerlerdiń jeke qorǵanys quraldaryn qoldanýyn baqylaýdy, sondaı-aq jumys barysyndaǵy anyqtalǵan zańbuzýshylyqtardy ýaqtyly joıýdy usynady», – delingen vedomstvo habarlamasynda.
Aıta keteıik, Qylmystyq kodekstiń 156-baby 4-bóligine sáıkes, eńbekti qorǵaý, ónerkásiptik sanıtarııa jáne qaýipsizdik tehnıkasy talaptaryn saqtaýdy qamtamasyz etýge mindetti adam atalǵan talaptardy buzyp, abaısyzda eki nemese odan da kóp adamnyń qaza bolýyna sebepker bolsa, ol 7 jylǵa deıin bas bostandyǵynan aıyrylady nemese dál sondaı merzimge bas bostandyǵy shekteledi. Sondaı-aq belgili bir laýazymdy atqarý nemese belgili bir qyzmetpen aınalysý quqyǵynan úsh jylǵa deıin nemese múlde aıyrý jazasy taǵaıyndalýy múmkin.