Temirqutylyq han – Altyn Orda hany (1395–1400). Urys hannyń nemeresi. Ámir Temir 1395 jyly Toqtamysty talqandaǵannan keıingi han. Bılikti hannyń atynan Edige bı júrgizdi. Saraı, Hajy-Tarhan, t.b. qalalarda Temirqutylyqtyń esimi jazylǵan teńgeler tabylǵan.
Aıaqqamyr mazary – Altyn Orda dáýirinde qyzyl kirpishten salynǵan sáýlet óneri. Ulytaý aýdany Jezdi aýylynan soltústikke qaraı 9 shaqyrym qashyqtyqta ornalasqan. Avtory, tapsyrys berýshi, qurylý tarıhy belgisiz.
Keseneni alǵash ret 1946 jyly Qazaq KSR Ǵylym akademııasynyń Ortalyq Qazaqstan arheologııa ekspedısııasy zerttedi. Akademık Á.H.Marǵulannyń pikirinshe, Temirqutylyqtyń molasy bolýy kerek. Temirqutylyq – kezinde Ámir Temirdiń qoldaýymen Altyn Orda bıligine Toqtamys hanmen talasqan tarıhı tulǵa.
Saıahatshy A.I.Shrenk pen Sh.Ýálıhanovtyń el jazbalarynda bul eskertkishti buryn «Qamyr hannyń kúmbezi» dep ataǵan. Respýblıkalyq mańyzy bar eskertkishter tizimine engizilgen. Eskertkishke «Qazqaıtajańǵyrtý» respýblıkalyq memlekettik kásiporny 2013–2014 jyldary qalpyna keltirý jumysyn júrgizdi.
Ulytaý oblysy