Qyzylordada jergilikti taýar óndirýshilerdiń qatysýymen «Qazaqstannyń úzdik taýary – 2025» kórmesi ótip, «Bir aýyl – bir ónim» jobasy aıasynda jasalǵan ónimder kópshilikke usynyldy. Keıingi jyldary óńirde óńdeý ónerkásibi 18,2%-ǵa artyp, óńirlik ónimdegi shaǵyn jáne orta bıznestiń úlesi 21%-dan asqan. Jylyna 11 myńnan astam jańa jumys orny paıda bolatyn aımaqta qazir 65 myńǵa jýyq shaǵyn jáne orta kásipkerlik nysany jumys istep tur.
Oblys ákimi Nurlybek Nálibaev kásipkerlerge qaıtarymsyz granttardan bastap, jeńildetilgen nesıe men memlekettik sýbsıdııalar berý arqyly ınvestısııalyq, qarjylyq, ınfraqurylymdyq qoldaý kórsetilip jatqanyn aıtty. Oblysta aldaǵy 5 jylda quny 2 trln teńge bolatyn 89 ınvestısııalyq jobany iske qosyp, 11 myńnan asa turaqty jumys oryndaryn ashý josparlanǵan. Bıyl 302 mlrd 500 mln teńgelik 27 joba júzege asady degen jospar bar. Túrkııalyq ınvestor «Aksa Enerdjı» kompanııasy salyp jatqan jylý elektr ortalyǵy, zamanaýı kirpish zaýyty, jylyna 1,1 mln tonna qıyrshyq tas shyǵaratyn óndirister iske qosylmaq.
Kondıterlik jáne makaron ónimderin óndiretin keshen men túıe sútinen jylyna 392 tonna qurǵaq untaq shyǵaratyn zaýyt boı kóteredi. Kalsılengen soda zaýyty, «Shalqııa» ken-baıytý fabrıkasy, kókónis pen jemis saqtaý, alma shyrynyn shyǵarý kesheni, bes juldyzdy «Rixos» qonaqúıi, koreıalyq «ÝızIý» kompanııasynyń turmystyq qatty qaldyqtar óńdeıtin zaýyty, «Seven Rıvers» kompanııasynyń bótelke shyǵaratyn zaýyty óńir óndirisine jańa lep qosady degen úmit bar. О́ńirde bıyl jeke kásipkerlikti qoldaýǵa qarjylandyrýdyń barlyq kózinen 30 mlrd teńgeden astam qarjy qarastyrylady.
Shıeli aýdanynda byltyrdan beri qurylysqa arnalǵan qurǵaq qospalar shyǵaryp kele jatqan «Orda Best Stroy» JShS ónimderi suranysqa ıe. Kásiporyn ıesi Abzal Ernazarovtyń aıtýynsha, «Damý» qorynan alǵan 10 mln teńge nesıe óndiristik seh salýǵa jumsalypty.
«Qurǵaq qospalar aq jáne sur bolyp ekige bólinedi. Aqtyń negizgi shıkizaty gıps bolsa, surdyki – sement. Biz kásip asharda osyǵan nazar aýdardyq. Qazir shıkizatqa Shıelidegi «Gejýba sement» zaýytynyń ónimin paıdalanamyz. Qum da ózimizden shyǵady. Tek hımııalyq qospalardy ózge oblystardan jetkizip otyrmyz. Sehta 10 adam jumys isteıdi. О́nimimiz oblys aýdandarynan bólek kórshiles óńirlerge ketip jatyr. О́nim daıyndaýda Almatydaǵy tehnolog mamandar ázirlegen qospalar quramyn qatań saqtaımyz», deıdi ol.
Memleket qoldaýymen aıasyn keńeıtken kásiporynnyń biri – «Syr jıhazy» JShS. Osydan 30 jyl buryn isin aǵash buıymdaryn shyǵarýdan bastaǵan mekeme 2009 jyldan beri qazirgi ataýymen tanymal. Tutynýshylar búginde 30-dan asa adamdy turaqty jumyspen qamtyp otyrǵan seriktestikti sapaǵa jumys isteıtin kásiporyn dep tanıdy. Aǵash, boıaý, plastıkalyq jáne jıhaz sehtarynan shyqqan ónimder syrttan keletin taýarlardan bir mysqal da kem emes. «Syr jıhazy» úı men keńse, mektep jáne medısına mekemeleri, sulýlyq salondaryna qajetti ádemi ári sándi jıhazdardyń san alýan túrin daıyndaıdy. Biraz jyl buryn «Damý» baǵdarlamasy arqyly aıasyn keńeıtken kásiporyn óndiriske qajetti jabdyqtar satyp alyp, jumys ónimdiligin arttyrýǵa den qoıdy. Kórmede seriktestik shyǵarǵan esikter men baspaldaqtar qoıyldy.
«Esikpen qatar 20 jyldan beri bizdiń kásiporyn jasaǵan besik te shetelderge shyǵarylyp keledi. Qaıyń aǵashynan jasalatyn bul buıymnyń jınalmaly túri de bar», deıdi seriktestik ókili Ásııa Qojahmetova. Kórmede dál osy seriktestik «Halyqqa arnalǵan úzdik taýarlar» atalymy boıynsha 3 júldeniń birin ıelendi.
Úzdik ónimder baıqaýǵa túsken kórmede «О́ndiristik maqsattaǵy úzdik taýarlar», «Úzdik azyq-túlik taýarlary» jáne «Halyqqa arnalǵan úzdik taýarlar» atalymdary boıynsha kompanııalar marapattaldy.
Qyzylorda