Osy jyldyń 4-14 qyrkúıek aralyǵynda Anglııanyń Lıverpýl qalasynda bokstan álem chempıonaty ótedi. World Boxing uıymy uıymdastyrǵan bylǵary qolǵapshylardyń básekesinde 10 salmaq dárejesinde jeńimpazdar anyqtalady, dep jazady Egemen.kz.
Qazaqstan erler boks quramasynyń bas bapkeri Qaırat Sátjanov 6 shilde aıaqtalǵan Astanadaǵy álem kýboginde «altyn» alǵan boksshylar osy álem birinshiligine tikeleı joldama alatynyn aıtty.
Al keı salmaq dárejelerinde áli de saraptaý kerek. Dese de bas bapker 70 kelide Tórehan Sabyrhan Lıverpýldegi álem birinshiligine baratynyn aıtty. Osy salmaqta elordadaǵy álem kýboginde qolǵap túıistirgen Abylaıhan Júsipov birinshi jekpe-jeginde Qyrǵyzstan ókili Almaz Orozbekovke jeńilip qalǵan edi.
«Keı jigitter jaraqatyna qaramastan jeńiske jete bildi. Al altyn alǵandar mindetti túrde Lıverpýldegi Álem chempıonatyna barady. Sonymen qatar 70 kelide Tórehan Sabyrhan da baq synaıtyn bolady. Qalǵandar jattyǵý jekpe-jekteri men aldaǵy jıyndar qorytyndysy boıynsha anyqtalady», dedi Qaırat Sátjanov.
Buǵan deıin Tórehan Sabyrhan Ulttyq olımpıadalyq komıtetke bergen suhbatynda ázirge 70 kelide ekinshi nómirli boksshy ekenin aıtqan bolatyn.
«Abylaıhan aǵanyń bul salmaqtaǵy tájirıbesi mol. Sondyqtan bapkerler shtaby dál osy jarysqa ony shyǵarýdy jón dep tapty. Árıne, bapkerdiń sheshimi - biz úshin zań. Ázirge men osy salmaq dárejesinde ekinshi nómirli sportshymyn», dedi Tórehan Sabyrhan.