Mattel kompanııasy alǵash ret 1-tıptegi qant dıabeti dıagnozy bar Barbı qýyrshaǵyn tanystyrdy. Bul tek oıynshyq qana emes, balalar boıynda janashyrlyq pen ózgelerdi túsine bilý qabiletin damytýdy kózdeıtin mańyzdy bastama. Sonymen qatar, atalǵan qýyrshaq aýrýymen kúndelikti ómir súrip júrgen balalarǵa ózderin senimdi ári jaıly sezinýge sep bolady, dep jazady Egemen.kz.
Qýyrshaqtyń bileginde qandaǵy qant mólsherin úzdiksiz baqylaýǵa arnalǵan CGM qurylǵysy (kontınýaldy glıýkoza monıtorıngi) ornatylǵan. Al belinde – ınsýlındi avtomatty túrde engizetin arnaıy ınsýlın engizetin qurylǵy bar. Mundaı qurylǵylar qant dıabetiniń 1-tıpimen aýyratyn balalardyń ómirinde jıi kezdesedi. Degenmen qýyrshaqtyń ózi bıologııalyq turǵydan eshqandaı naqty qyzmet atqarmaıdy, ıaǵnı qýyrshaqtyń ishinde qan joq, qurylǵylar tek syrtqy pishinimen beınelengen.
Mattel bul úlgini Breakthrough T1D halyqaralyq uıymymen birlese ázirledi. Uıym 1-tıpti dıabetke shaldyqqan jandardy qoldaýmen aınalysady. Kompanııa ókilderi bul bastama arqyly ózindik ereksheligi bar balalardyń oıynnan óz beınesin kórýine múmkindik berip, olardy jalǵyz emes ekenine sendirgisi keledi.
Jańa Barbıdiń kıimi – kók tústi jeıde pen burshaqty beldemshe – dıabet jaıly halyqaralyq aqparattandyrý qozǵalysynyń sımvolıkasyna negizdelgen. Sonymen birge, Mattel kompanııasy tanymal model Keıt Mostyń qyzy, 12 jasynda qant dıabeti anyqtalǵan Lıla Mostyń beınesindegi qýyrshaqty da usyndy.
Mattel sońǵy jyldary Barbı serııasyn ártaraptandyrýǵa erekshe nazar aýdaryp keledi. Buǵan deıin kompanııa dene bitimi ártúrli, boıy alasa ne uzyn, kórý qabileti tómen, sondaı-aq Daýn sındromy bar keıipkerlerdi oıyn álemine engizgen bolatyn.