Uly Otan soǵysynyń aıaqtalyp, Jeńis jalaýy jelbiregenine – 70 jyl. Aıtýly kún qarsańynda «QazMunaıGaz» UK» AQ-tyń Jastar keńesi bastamashylyq tanytyp «Babalar syılaǵan beıbit kún» atty aksııa uıymdastyrdy. Aksııa aıasynda jastar respýblıka óńirlerinde ardagerlermen kezdesý ótkizip, olarǵa aqshalaı kómek kórsetip, turǵyn úılerin jóndeýden ótkizip, saýapty is atqardy.
Surapyl soǵys jyldarynda oq pen ottyń ortasynda júrip, elin qorǵaǵan sarbazdarǵa qandaı qurmet kórsetilse de artyq bolmas. Sondyqtan da, «QazMunaıGaz» UK» AQ janyndaǵy Jastar keńesi jyl saıyn ardagerlerdiń úılerine baryp quttyqtaýdy úlken paryz sanaıdy. Beıbit kúndi syılaǵan qart maıdangerlerge qarjylaı kómek kórsetilip, syılyqtar tabystap, qazynaly qarııalardyń áńgimelerin tyńdaıdy. Bıyl da sol ıgi dástúr jalǵasyn tabýda.
Sondaı júzdesýdiń biri Uly Otan soǵysynyń ardageri, Astana qalasynyń turǵyny, 94 jastaǵy Shaımuhan Muqanovtyń shańyraǵynda ótti. Ekinshi dúnıejúzilik soǵys maıdangeri, memlekettik qaýipsizdik organynyń qurmetti qyzmetkeri, polkovnık Shaımuhan Muqanov Semeı oblysyndaǵy Abyraly aýdanynyń týmasy. 1941 jyldyń 22 maýsymynda kelgen sýyq habar jas azamattyń ómirin túbegeıli ózgertti. Sol kúni-aq, tutqıyldan soǵys bastaǵan nemisterge qarsy turý úshin ol Lenıngrad maıdanyna attandy. 10 shildede 177-shi atqyshtar dıvızııasynyń quramyna kirip, soǵystyń bel ortasynda júrdi. Jaýjúrek jaýynger sum soǵys aıaqtalǵansha alǵy shepte atoılap Otan úshin, týǵan jer úshin aıanbaı shaıqasty. Aıbyndy atqarǵan mindetiniń arqasynda kishi áskerı tehnıkten atqyshtar batalonynyń maıor shenindegi komandıri dárejesine deıin kóterildi.
– Meniń ómirlik mektebim qarǵys atqyr qatal soǵys boldy, jastyq shaq, balalyq shaq degen mende bolǵan joq. Shaıqas alańynda júrip erjettim, shynyqtym. Soǵysqa alǵash kirgenimde tehnık, keıin rota pýlemetshisi, al soǵystyń eń qıyn tusy – 1942 jyldyń aqpan aıynda batalon komandıri edim. Ol kezde jasym 20-dan asqan bozbalamyn, al bir batalonda 600 shamasynda jaýynger boldy. Qan maıdanda qataryńnyń qyrshynynan qıylyp jatqanyn kórip, eriksiz boıyńa qýat jınap, jeńiske umtyla túsesiń, – deıdi Shaımuhan Muqanov qarııa ótken zulmatty eske alyp.
«QazMunaıGaz» ulttyq kompanııasy» AQ janyndaǵy Jastar keńesi eshqandaı nusqaýsyz óz bastamalarymen elordadaǵy 10 ardagerdi, el aımaqtaryndaǵy 60-qa jýyq maıdangerdi quttyqtaýdy josparǵa alyp, qazirgi tańda sol sharalardy júzege asyrýda. Jalpy, bul sharaǵa «QazMunaıGaz» kompanııalar tobynyń Qazaqstan boıynsha 40-qa jýyq enshiles jáne táýeldi kásiporyndaryndaǵy Jastar keńesteriniń músheleri atsalysýda. Elimizdiń Atyraý, Mańǵystaý, Pavlodar, Qyzylorda oblystarynda jáne Astana, Almaty qalalarynda osyndaı sharalar júrgizilip jatyr.
Quttyqtaý qurmetine ıe bolǵan ardagerler arasynda Máskeý, Lenıngrad qalalaryn jaýdan qorǵaǵan jáne Stalıngrad shaıqasyna qatysqan maıdangerler, Reseı, Belarýs, Ýkraına jáne Eýropa qalalaryn azat etýshiler, kóptegen jaýyngerlik ordender men medaldardyń ıegerleri, tyl eńbekkerleri bar. Osylaısha, jastar Jeńis kúnin syılap, beıbit kúnge qol jetkizgen jandarǵa alǵystaryn bildirýde. Urpaqtar jalǵastyǵy degen, mine, osy bolar!
Marat AQQUL, «Egemen Qazaqstan».