Sársenbi kúni Taıvan aýmaǵynda jyl saıyn ótetin «Han Kýang» áskerı jattyǵýlary bastaldy. Bıylǵy oqý-jattyǵý 10 kúnge sozylady. Bul ádettegiden eki ese uzaq merzim. Oǵan 20 myńnan astam rezervıst pen azamattyq tulǵalar tartylǵan, dep jazady Egemen.kz.
Jattyǵýdyń negizgi maqsaty – turǵyndar men armııany Qytaı tarapynan tónýi múmkin shabýylǵa daıyn bolýǵa baýlý. Sonymen qatar bul shara Taıvannyń qorǵanys qabiletin pash etip, Beıjińge naqty eskertý sıgnalyn berýge baǵyttalǵan.
Taıbeı úkimetine qarasty Ulttyq qorǵanys jáne qaýipsizdik ınstıtýtynyń sarapshysy Che Chýn: «Bıylǵy jattyǵý jospary Qytaı shabýyly jaǵdaıynda oryn alýy yqtımal shynaıy ssenarıılerdi kóbirek qamtıdy. Bul – uzaqmerzimdi qarsy turý men azamattyq turaqtylyqty kúsheıtýge baǵyttalǵan shara», dep málimdedi.
Taıvannyń qazirgi prezıdenti Laı Chın-te Qytaı tarapynan bolýy múmkin áskerı qaýipke qarsy daıyndyqty basty basymdyq retinde belgilegen. Ol sońǵy aptada birneshe úndeý jasap, jurtty ulttyq birlikke shaqyrdy. Buǵan Beıjiń narazylyq bildirdi. Al ótken jyldyń qyrkúıeginde Laı Chın-te azamattyq qorǵanys komıtetiniń alǵashqy otyrysyn ótkizip, kez kelgen tótenshe jaǵdaı kezinde araldyń turaqty jumys isteýin qamtamasyz etý qajettigin alǵa tartqan bolatyn.
Qytaı Taıvandy óziniń bólingen aýmaǵy sanap, ony kúshtep bolsa da «qaıta biriktiremiz» dep málimdep keledi. Bul aıtylǵan sózder Taıvanǵa qatysty jaǵdaıdy qıyndatyp jatyr. Sol sebepti AQSh qatysýy múmkin úlken soǵys bastalyp kete me degen qaýip bar.