Sot Ońtústik Koreıanyń burynǵy prezıdenti Iýn Sok Ioldi ótken jyldyń jeltoqsan aıynda áskerı jaǵdaı engizý áreketi úshin qamaýǵa alý týraly order berdi, dep habarlaıdy Egemen.kz Yonhap agenttigine silteme jasap.
Seýldiń Ortalyq okrýgtik soty arnaıy prokýror Cho Yn Soktyń ótinishi negizinde eks-prezıdentti tutqyndaýǵa ruqsat bergen. Sot sheshiminde Iýn Sok Ioldiń dálelderdi joıýy múmkin ekeni kórsetilgen.
Arnaıy prokýror basqaratyn tergeý toby burynǵy memleket basshysyna bes negizgi aıyp taǵyp otyr. Onyń ishinde 3 jeltoqsanda jarııalanǵan áskerı jaǵdaı aldyndaǵy keńeske Mınıstrler kabıneti músheleriniń tek bir bóligin shaqyrý arqyly olardyń quqyqtaryn shekteý áreketi de bar.
Iýn Sok Iol men onyń qorǵaýshylary sot tyńdaýyna qatysyp, barlyq aıyptaýlardy joqqa shyǵarǵan. Tyńdaýdan keıin ol tergeý ızolıatoryna jetkizilgen.
Aıta keteıik, bul Iýn Sok Ioldiń ekinshi ret qamaýǵa alynýy. Alǵash ret ol qańtar aıynda, prezıdenttik ókilettigi aıaqtalmaǵan kezde tutqyndalǵan bolatyn. Alaıda naýryz aıynda sot sheshimimen bosatylǵan edi.