Taǵylymdy da tartysty týrnır

Elimizde tórtinshi ret ótkizil­gen týrnırge qyzyǵýshylyq jyldan-jylǵa artyp keledi. Bul buqa­ralyq sport pen salamatty ómir saltyna degen halyqtyń erek­she yntasyn kór­setedi. Bıyl­ǵy ja­rys­tyń bas­ty jańalyǵy – erek­she qajettiligi bar 15 bala­nyń qa­tysýy boldy. Ár ba­l­aǵa táji­rı­beli júzgishten ar­naıy serik be­ki­tildi. Solardyń biri – tany­mal zańger, 2019 jyly La-Mansh buǵazyn jalǵyz júzip ót­ken al­ǵashqy ­otandasymyz ­ Er­­jan Esim­hanov.

«Búgin men Tumar Muratqyzyn alyp júrdim. Ol – naǵyz qaısar qyz, 500 metrdi sátti júzip shyqty. Álemniń túkpir-túkpirinen kelgen ártúrli jastaǵy adamdardy biriktirgen bul birinshiliktiń bas­ty qundylyǵy – ashyqtyǵy men qoljetimdiligi», dedi E.Esimhanov.

Eresekter arasyndaǵy «Inspiration» sanatyndaǵy 2 sha­qy­­­rymdyq qashyqtyqta eli­miz­diń al­ǵash­qy paralımpıada chem­­pıony, ult­­tyq quramanyń kapı­tany Zúl­fııa Ǵabıdýllına júldeger atandy.

«Bıyl 59 jasqa toldym. Biraq sporttan ketýdi oılap júr­gen joqpyn. Qyrkúıekte Sınga­pýr­de ótetin álem chempıonatyna qyzý daıyndalyp jatyrmyn. Jas sport­shylarǵa aıtarym – esh­qa­shan toqtamańdar, alǵa umty­lyńdar. Bapkerlerińdi esten shy­ǵarmańdar, olardyń eńbegin baǵa­lańdar», deıdi qurama kapıtany.

5 shaqyrymdyq «Half oceanman» jarysynyń 20–29 jas sana­tynda Stanıslav Redko jeńi­s­ke jetti. Sýda júzý sheberi Asta­­nada jattyqtyrýshy bolyp qyz­­­met etedi, burynyraqta ashyq sý­da júzýden el chempıony atan­ǵan.

«Sheber» sanatynda tájirıbeli sport­shylarymyz tórt altyn me­daldyń úsheýin ıelendi. Áıel­der arasynda ashyq sýda júzý­den sport sheberi, Orta Azııa oıyn­darynyń kúmis júldegeri, sý­asty baǵdarlaýdan álem kýboginiń qola júldegeri Irına Lazareva absolıýtti jeńimpaz bolyp tanyldy. Almatylyq sportshy Qonaev­taǵy jarysqa úshinshi jyl qatysyp otyr. Úsh rette de jeńimpazdar qatarynan kórindi.

10, 5 shaqyrymdyq qashyqtyqta jerlesterimiz Lev Cherepanov pen Ǵazıza Qumaqbaeva absolıýtti chem­pıon atandy. 2 shaqyrym qashyq­tyqtaǵy «Sprint» sanatynda Birik­ken Arab Ámirlikterinen kel­gen Rodrıgo Malan men otandasy­myz Taısııa Korotkova jeńiske jetti.

«Oceanman» – álemniń ártúr­li elinde ótetin birneshe kezeń­­­­­nen turatyn halyqaralyq jarys. Maý­sym sońynda fınaldyq jarys uıym­dastyrylady. Ár kezeńde úzdik shyqqan 10 er, 10 áıel sportshy fı­nalǵa joldama alady. Bıyl­ǵy fınaldyq syn jeltoqsan aıynda Dýbaıda ótedi.

Almaty oblysy