Abaı oblysy Geologııalyq barlaý kolledjinde mektep oqýshylaryna arnalǵan jas geologterdiń ekinshi respýblıkalyq olımpıadasynyń ashylý saltanaty boldy. Jarys 8-15 shilde aralyǵynda kolledj bazasynda jáne Qaraýyl shoqy oqý polıgonynda ótedi.
Jas geologter olımpıadasy Geologııa komıtetiniń qoldaýymen «Jas geolog» korporatıvtik qory men Geologııalyq barlaý kolledjiniń uıymdastyrýymen ótkizilip jatyr. Jarystyń demeýshileri – Kazakhmys, ERG, Kazzinc, Yer-Tai, Geoken, «Alel» qarjy-ınvestısııalyq korporasııasy, «Embimunaıgaz», «ProLabSupport» jáne «Solidcore Resources» kompanııalary.
Olımpıadanyń ashylý saltanatynda demeýshilerdiń biri «Kazakhmys Barlau» kompanııasy atqarýshy dırektory Qadyrjan Qaýldashev jarystyń basty maqsaty jas geologterdi qoldaý ekenin jetkizdi.
«Biz osy saıysty ótkize bastaǵan kezde elimizde nebári jeti-segiz komanda ǵana bolatyn. Qazir olardyń sany jıyrmadan asty. Búginde olar tipti halyqaralyq olımpıadalarda júlde alyp júr. Olımpıadanyń maqsaty – jastardy erte kásiptik baǵdarlaý, oqýshylardyń geologııa ǵylymdaryn oqýǵa degen qyzyǵýshylyǵyn, geologııany ǵylym retinde jáne onyń qoldanbaly mańyzdylyǵyn arttyrý, daryndy balalardy anyqtap, olardy qoldaý, oqýshylardyń nazaryn geoekologııa jáne jer qoınaýyn qorǵaý máselelerine aýdarý. Sondyqtan barsha qatysýshylarǵa sáttilik tileımiz», dedi kompanııa ókili.
Jarys qorytyndysynda jekelegen pánderde jeńiske jetken oqýshylar Satbayev University, Qazaqstan-Brıtan tehnıkalyq ýnıversıteti, S. О́tebaev atyndaǵy Atyraý munaı jáne gaz ýnıversıteti, Á.Saǵynov atyndaǵy Qaraǵandy tehnıkalyq ýnıversıteti syndy jetekshi joǵary oqý oryndarynyń bilim granttaryna ıe bolatyny da aıtyldy.
«Jas geologter olımpıadasy – bolashaq mamandardy daıarlaýǵa jol ashatyn kásibı alań ǵana emes, sonymen birge óskeleń urpaqqa týǵan jerge degen súıispenshilik pen patrıottyq sezim qalyptastyratyn taǵylymdy bastama. Oǵan elimizdiń 15 óńirinen 180 talapker qatysyp jatyr. Qatysýshylar paleontologııa, mıneralogııa jáne petrografııa, magnıtometrııa, gıdrogeologııa, geologııalyq qıma jasaý, munaı men gazdy izdeý, dala jaǵdaıynda turaq uıymdastyrý jáne shlıhti synaý sekildi baǵyttar boıynsha baq synaıdy», deıdi uıymdastyrýshylar.
Jarystyń ádilqazylar alqasynyń quramyna granttyq baǵdarlamaǵa qatysýshy joǵary oqý oryndarynyń bedeldi professorlary men bilikti oqytýshylary, sondaı-aq «Kazakhmys Barlau», «Qazaq Geophysics» jáne «ERG» kompanııalarynyń jetekshi mamandary bar.
«Qazylar alqasy Satbayev University, Qazaqstan-Brıtan tehnıkalyq ýnıversıteti, Semeı qalasynyń Geologııalyq barlaý kolledjiniń oqytýshylar quramynan jasaqtaldy. Saıys qorytyndysy boıynsha eń úzdik jas geologter komandasy anyqtalady. Sondaı-aq osy olımpıada aıasynda úzdik jas geologterdiń de esimderimen tanysatyn bolamyz. Olımpıada 15 shildege deıin jalǵasady. Jeńimpazdar elimizdiń eń úzdik JOO-lary men kolledjderinde oqý granttaryn ıelenedi. Olımpıadanyń jabylý rásimi 14 shildege josparlanǵan», deıdi bas tóreshi Nurǵanym Esimhanova.
Uıymdastyrýshylardyń aıtýynsha, bul – bilim báıgesi ǵylym salasynda jastardyń tanylýyna taptyrmas múmkindik. Baıqaýymyzsha, jarysqa qatysqan jastardyń kóbi atalǵan olımpıadaǵa ekinshi ret qatysyp otyr eken. Solardyń biri – jetisýlyq Aqjol Bolat.
«Osy ekinshi respýblıkalyq jas geologter olımpıadada segiz túrli jarys bolady, sol segiz jarystyń men munaı men gaz izdeý jáne mıneralogııa jarystaryna qatysamyn. Bul olımpıada – bilim deńgeıimizdi shyńdaı túsetin eń mańyzdy saıys. Sondyqtan barsha qatysýshylarǵa sáttilik tileımin», deıdi ol.
Abaı oblysy