Premer-mınıstr Oljas Bektenov Prezıdenttiń tapsyrmasyn oryndaý aıasynda ádilet organdaryn sıfrlandyrý máseleleri boıynsha jıyn ótkizdi, dep jazady Egemen.kz.
Jıynda quqyqtyq júıeniń negizgi baǵyttaryna sıfrlyq sheshimderdi engizý qarqynyn pysyqtaý, atqarýshylyq is júrgizýdiń ashyqtyǵy men tıimdiligin arttyrý, sot-saraptama qyzmetin jańǵyrtý jáne halyqtyń quqyqtyq kómekke qoljetimdiligin keńeıtý jónindegi sharalar qaraldy.
Oljas Bektenov sıfrlandyrý men jasandy ıntellekt elementterin engizý barlyq salanyń damý tıimdiligin arttyrýda mańyzdy ról atqaratynyn atap ótti. «Memleket basshysy kúni keshe iske qosqan sýperkompıýter elimizdegi sıfrlyq damýdyń jańa paraǵyn ashyp otyr. Bul - Ortalyq Azııadaǵy alǵashqy sýperkompıýterlik klaster, sondaı-aq, aımaqtaǵy eń qýatty eseptep shyǵarý qurylǵysy. Onyń múmkindikteri memlekettik organdar, ǵylymı ınstıtýttar, joǵary oqý oryndary men bıznes úshin qoljetimdi bolmaq. Sondyqtan barlyq vedomstvolar osy baǵyttaǵy jumysty jandandyrýy tıis», dedi Oljas Bektenov.
Jıynda ádilet mınıstri Erlan Sársembaev salanyń sıfrlyq transformasııasy jáne jańa servısterdi engizý týraly baıandama jasady. Onyń aıtýynsha, «E-notarıat» júıesinde 2025 jyldyń 1 sáýirinen bastap «Taraptardyń jeke kabıneti» paıda boldy. Fýnksııa boryshkerge atqarýshy jazbaǵa onlaın rejımde kelisim nemese qarsylyq bildirýge múmkindik beredi. Bıometrııalyq sáıkestendirý jáne aýmaqtylyqtyń saqtalýyn baqylaý qamtamasyz etiledi. Osy servısti engizýdiń arqasynda 450 myńnan astam azamat habarlama alyp, onyń ishinde 43 myńnan astamy qarsylyq bildirý múmkindigin paıdalanǵan. Nátıjesinde osy baǵyt boıynsha shaǵymdar sany 20%-ǵa qysqarǵan. Atqarýshylyq is júrgizý salasynda «Sıfrlyq assıstent» kómekshisi engizilgen. Júıe qaýlylardy baqylaýǵa jáne qaryzdy onlaın tóleýge múmkindik beredi, jeke sot oryndaýshylary (JSO) úshin oryndaý merzimi týraly eske salý fýnksııasy engizilip otyr. Sonymen birge JSO-lar arasynda atqarýshylyq qujattardy avtomatty túrde bólý tetigi iske qosyldy. Bul zańsyz ýaǵdalastyqtar múmkindigin boldyrmaıdy jáne ákimshilik júktemeni azaıtady. Erlan Sársembaev «E-Saraptama» júıesinde tiri adamdardy kýálandyrý boıynsha pılottyq modýl iske qosylǵanyn habarlady. Mundaı sıfrlyq sheshim uıǵarym berýdi jáne tekserý shablondaryn paıdalanýdy avtomattandyrý esebinen sot saraptamalarynyń sapasyn arttyrýǵa baǵyttalǵan. Sonymen qatar bul modýldiń adamı faktordy azaıtý jáne ashyqtyqty arttyrý maqsatynda jasandy ıntellekt fýnksııalaryn paıdalanatyn jańa nusqasy ázirlenip jatyr. Halyqqa quqyqtyq kómek kórsetý sheńberinde osy jyldyń mamyr aıynan bastap «Ádilet» jáne «E-Zań kómegi» júıelerinde jasandy ıntellekt bazasynda «Sıfrlyq konsýltant» iske qosylǵan. Servıs azamattarǵa tıptik úlgidegi quqyqtyq suraqtar boıynsha avtomatty túrde aqyl-keńes beredi. Osylaısha memlekettik organdardyń qyzmetkerlerine túsetin júktemeni azaıtady. Úkimettiń baspasóz qyzmeti, quqyqtyq normalar shyǵarmashylyǵy salasynda da sıfrlyq sheshimder ázirlenip jatqanyn habarlady. Mınıstrlik avtorlyq quqyqtardy ujymdyq negizde basqarý úshin zııatkerlik menshik boıynsha Biryńǵaı sıfrlyq platforma qurý týraly zań jobasyna bastamashylyq jasady. Servısti iske qosý 2026 jylǵa josparlanǵan. Premer-mınıstr ádilet organdarynyń elimizdiń quqyq júıesindegi mańyzdy rólin erekshe atap ótti. Quqyqtyq rásimderdiń ashyqtyǵyn, qoljetimdiligi men jedeldigin arttyratyn zamanaýı quraldarsyz tıimdi quqyq qoldaný praktıkasyn júzege asyrý múmkin emestigi atap ótildi.