Atyraýda dinı aǵymdar jetegine eretinderdiń qatary áli de azaımaı otyr. Oblystyq prokýratýra basqarma basshysynyń mindetin atqarýshy Temirbek Dárjanovtyń málim etýinshe, jyl basynan beri dinı ekstremızm men terrorızmge qatysty 39 qylmys anyqtalypty. Sonyń ishinde, Sırııa men Ýkraınadaǵy qarýly qaqtyǵystarǵa qatysýǵa baılanysty 23, terrorızmdi nasıhattaǵan-9, terrorıstik top qurý-1, ekstremıstik áreketti uıymdastyrý maqsatynda adamdy azǵyryp kóndirý-1, terrorıstik toptarǵa qarjylaı kómektesýge qatysty 5 derek tirkelipti. Sonymen birge, ruqsat etilmegen jerde dinı ádebıetterdi satýdyń 4 deregine baılanysty kinálilerge 50 aılyq eseptik kórsetkish kóleminde aıyppul salynypty.
«Prokýratýra quqyq qorǵaý organdarymen birlesip oblystyń úsh turǵynyn Sırııadaǵy qarýly qaqtyǵysqa qatysýǵa ketip bara jatqan jerinen ustady. Qazir olarǵa qatysty Qylmystyq kodekstiń 24-baby (qylmysqa daıyndalý), 172-baby (sheteldegi qarýly qaqtyǵysqa qatysý), 256-baby (terrorızmdi nasıhattaý) jáne 259-babymen (ekstremıstik áreketterdi uıymdastyrý maqsatynda adamdardy azǵyryp kóndirý) tergeý amaldary júrgizilip jatyr», dedi oblystyq prokýratýra basqarma basshysynyń mindetin atqarýshy Temirbek Dárjanov.
Joldasbek ShО́PEǴUL, «Egemen Qazaqstan».
ATYRAÝ.