О́ńirlerdi aralap júrgen senatorlar aýyl-aımaqtaǵy jol, aýyzsý, maman tapshylyǵy sekildi máseleler áli de sheshimin tappaı otyrǵanyn aıtady.
Senator Talǵat Júnisov Aqmola oblysyndaǵy Sandyqtaý jáne Atbasar aýdandarynda boldy. Ol Sandyqtaý aýdanynyń Balkashıno aýylyndaǵy balalar men jasóspirimder shyǵarmashylyǵy ortalyǵyn aralady. Sondaı-aq Jabaı ózeniniń jaǵalaýyn nyǵaıtý jáne túbin tereńdetý barysyn, Kamenka aýylyndaǵy «Shensov kópiri» gıdrotehnıkalyq qurylysynyń jaı-kúıin kórdi.
Sapar aıasynda azamattardy da qabyldady. Onda áleýmettik qoldaý, turǵyn úımen qamtamasyz etý, tólemderdi usyný jáne basqa da ótinishter qaraldy. Sapar sońynda senator Bastaý aýylynda sút-taýar fermasy qurylysyna soqty. Ferma jyl sońynda iske qosylmaq, jalpy quny 7,5 mlrd teńgege Germanııadan 918 bas iri qara mal satyp alýdy josparlap otyr.
Al Senat depýtaty Álibek Náýtıev Atyraý oblysynda Qurmanǵazy aýdany Azǵyr aýyldyq okrýginiń turǵyndarymen kezdesti. Ol burynǵy polıgon aýmaǵynda ornalasqan eldi mekenderdegi áleýmettik nysandar men ashyq alańdardy aralady.
Qazir aýdanda jaıylymdarda ylǵal azaıyp, qunarly jerler tozǵan, nátıjesinde mal shyǵynǵa ushyrap, klımattyń ózgerýine oraı shabyndyq jerler qýrap ketken. Turǵyndar polıgon jerlerinde jemshópti sýbsıdııalaý jáne shóp daıyndaýǵa ruqsat berýdi ótinip otyr. Aqbókenderdiń sanyn retteý máselesi de kóterildi.
Al Mahambet aýdanynda Baqsaı aýyldyq okrýgindegi mektep apatty jaǵdaıda, kentishilik joldar qurylysy aıaqsyz qalyp, sý basqan joldardy qalpyna keltirý, sýmen jabdyqtaý men kanaldardy tazartý da basty máseleniń biri bolyp otyr.
«Salalyq memlekettik organdarmen birlesip barlyq ótinish nazarǵa alynyp, tirkeledi. Aıtylǵan usynystar depýtattyq baqylaýǵa alynady», dedi Á.Náýtıev.
Depýtat Olga Býlavkına Shyǵys Qazaqstan oblysyndaǵy Ulan aýdanynyń agroónerkásip kesheni men bilim berý júıesiniń jáne áleýmettik ınfraqurylymynyń negizgi nysandaryn aralady. Ýkraınka aýylynda sút fermasynyń qyzmetimen tanysty. Kásiporyn qazir qarjylandyrýda qıyndyq kórip, bilikti kadrlardyń tapshylyǵyn sezinip otyr.
O.Býlavkına Saratovka aýylyndaǵy tehnıka salasynyń mamandaryn daıarlaıtyn Shyǵys Qazaqstan kópsalaly kolledjinde de boldy. Oqý ornyna materıaldyq-tehnıkalyq bazany jańǵyrtyp, tájirıbege negizdelgen baǵdarlamalardy engizý qajet. Sondaı-aq jastar arasynda jumysshy mamandyqtaryn arttyrý máseleleri tur. Depýtattyń aıtýynsha, dýaldy oqytý men kolledjderdi óńir ekonomıkasyn damytýǵa kiristirý qajet.
Senat depýtattary Nurııa Nııazova men Janna Asanova Almaty qalasyndaǵy Balalarǵa shuǵyl medısınalyq járdem kórsetý ortalyǵynda boldy. Ortalyq pasıentterdi hırýrgııa, neırohırýrgııa, travmatologııa, ýrologııa, oftalmologııa, kúıikti emdeý jáne jańa týǵan náresteler hırýrgııasy sekildi baǵyttar boıynsha qabyldaıdy.
«Memlekettik saıasatta balalardyń densaýlyǵy basymdyqqa ıe bolyp otyr. Búginde qoldanystaǵy júıeni qoldaýmen qatar eń úzdik medısınalyq tájirıbe negizinde tez ári sapaly shuǵyl kómek kórsetiletin zamanaýı jaǵdaı jasaý qajet. Ol úshin úderisterdi ońtaılandyrý, tehnologııalardy engizý jáne eń bastysy – dárigerler men pasıentterdiń únemi baılanysy kerek», dedi N.Nııazova mekeme qyzmetkerlerimen kezdesýde.
Senatorlar sondaı-aq jańa týǵan nárestelerge arnalǵan jansaqtaý palatasynda bolyp, onda jas pasıentterdi qarqyndy emdeý sharttarymen tanysty. Olar atalǵan máselelerdi zań deńgeıinde sheshýge járdemdesýge jáne balalar medısınasyn nyǵaıtýǵa baǵyttalǵan bastamalardy qoldaýǵa daıyn ekenin jetkizdi.