Izraıl Gaza sektoryndaǵy soǵysty toqtatý úshin kelissóz júrgizýge daıyn. Alaıda bul úshin palestınalyq anklavtyń tolyq qarýsyzdanýy – basty talap. Bul týraly Izraıl premer-mınıstri Bınıamın Netanıahý Vashıngtonda júrip, arnaıy beıneúndeý arqyly málimdedi. Onyń aıtýynsha, HAMAS qarýyn tastap, áskerı jáne úkimettik isterden birjola bas tartýy tıis, dep jazady Egemen.kz.
Qazir Dohada AQSh, Qatar jáne Mysyrdyń araaǵaıyndyǵymen taraptar arasyndaǵy tikeleı emes kelissózder júrip jatyr. Kelissózdiń negizine Donald Tramp usynǵan jospar alynǵan. Onda atysty 60 kúnge toqtatý qarastyrylǵan.
«Biz barlyq tutqyndy qaıtaryp, oq atý áreketterin 60 kúnge toqtatýǵa ázirmiz. Osy ýaqyt ishinde taraptar uzaqmerzimdi beıbit kelisimge kelýge tyrysýy kerek. Alaıda, bul úshin HAMAS Gazadaǵy áskerı qurylymdardy joıyp, bılikten ketýi qajet. Eger bul talap oryndalmasa, biz ózge jolmen áreket etemiz», dedi Bınıamın Netanıahý.
Aıta keteıik, atys pen qaqtyǵys saldarynan Gaza sektory úlken gýmanıtarlyq daǵdarysqa ushyrap otyr. Izraıldiń bul málimdemesi kelissóz úderisine jańa serpin berip, taraptardy naqty sheshim qabyldaýǵa ıtermeleýi múmkin.