QR Prezıdenti janyndaǵy Ortalyq kommýnıkasııalar qyzmetiniń podkastynda Biryńǵaı esepke alý júıesi (BEJ) týraly aıtyldy. Jańa júıe oıynshylardyń múddesin qorǵaýǵa, sondaı-aq klıentter men býkmekerler arasyndaǵy daýlardy ádil sheshýge jol ashady, dep habarlaıdy Egemen.kz.
QR Týrızm jáne sport mınıstrligine qarasty Oıyn bıznesin jáne lotereıany retteý komıtetiniń tóraǵasy Ádilet Turǵanbaevtyń aıtýynsha, býkmekerlik keńselerge qatysty shaǵymdar kún saıyn tirkelip otyrady. Kóp jaǵdaıda klıentter utystaryn ala almaýyna nemese qarajatyn engizgen soń akkaýntynyń buǵattalýyna narazylyq bildiredi. Buryn mundaı daý týyndaǵanda mınıstrlik tek býkmekerlik keńseniń jaýabyna súıenýge májbúr bolǵan, al olardyń óz kinásin moıyndaýy óte sırek.
«Árıne, olar eshqashan, tipti kiná ózderinde bolǵan jaǵdaıda da, ony moıyndamaıdy. Al ádil sheshim shyǵarý úshin bizge júıe (BEJ) kómektesedi. Biz búkil bás tigý tarıhyn kóremiz. Eger adam bás tigip, utyp alsa, biraq túsiniksiz, erejelerde jáne zańda jazylmaǵan sebeptermen oǵan utys tólenbese, biz býkmekerlerdi shart talaptaryn oryndaýǵa mindetteımiz. Iаǵnı, biz klıenttiń azamat retinde tutynýshylyq quqyǵyn qorǵaımyz», dedi Ádilet Turǵanbaev.
Onyń aıtýynsha, zańsyz onlaın platformalarda oınaǵan adamdardyń quqyqtaryn memleket qorǵaı almaıdy. Ondaı saıttarda eshqandaı kepildik berilmeıdi. Al BEJ engizilgennen keıin zańdy býkmekerlik keńselerdi baqylaý jáne baǵalaý múmkindigi artady. Bul júıe kóleńkeli naryqpen kúresýge, zańsyz platformalardy buǵattaýǵa jáne azamattardyń tek zańdy ári qaýipsiz oıyn alańdaryn paıdalanýyna jaǵdaı jasaıdy. Sol kezde azamattar ondaı saıttarǵa kire almaıdy, tek quqyqtary zańmen jáne BEJ arqyly memleketpen qorǵalǵan zańdy alańdarda ǵana oınaıdy.