Basseındegi sýǵa túsken 14 adam medısınalyq kómekke júginýge májbúr boldy. Onyń úsheýi aýrýhanaǵa jatqyzyldy, dep habarlaıdy Egemen.kz.
Atyraý óńirlik kommýnıkasııalar qyzmeti taratqan aqparatqa súıensek, oqıǵa keshe, 13 shildede bolǵan.
«Atyraýdaǵy basseınderdiń birinde hlordan ýlanýdyń yqtımal jaǵdaıy tirkeldi. Medısınalyq kómekke 14 adam júgindi. Aýrýhanaǵa 3 adam jatqyzyldy. Dárigerler olardyń jaǵdaıyn turaqty dep baǵalady. О́zgeleri dárigerlerdiń baqylaýyna alyndy», dep habarlady óńirlik kommýnıkasııalar qyzmeti.
Oblys ákimi Serik Shápkenov atalǵan oqıǵaǵa baılanysty densaýlyq saqtaý basqarmasyna zardap shekkenderdiń jaǵdaıyn baqylaýda ustaýdy tapsyrdy. Sondaı-aq basqarmaǵa basseınder men akvaparkterdiń jumysyn tekserý júkteldi.
«Basseınde epıdemııaǵa qarsy is-sharalar júrgizildi. Aýa men sýdan synama alyndy. Hlor býy shekti mólsherden aspaǵan, zerthanalyq taldaý jumystary jalǵasyp jatyr», dep naqtylady óńirlik kommýnıkasııalar qyzmetinen.
Atyraý oblystyq polısııa departamentiniń baspasóz qyzmetiniń deregine qaraǵanda, basseındegi oqıǵaǵa qatysty qylmystyq is qozǵalǵan.
«Qylmystyq is tirkeldi. Tergeý júrgizilip jatyr. О́zge aqparat tergeý múddesine sáıkes jarııalaýǵa jatpaıdy», dep málimdedi departamenttiń baspasóz qyzmeti.