Elimizde mindetti áleýmettik medısınalyq saqtandyrý (MÁMS) júıesin jańǵyrtý aıasynda medısınalyq kómektiń biryńǵaı bazalyq paketin engizýdi kózdeıtin zań qabyldandy. Bul bastama densaýlyq saqtaý salasyndaǵy kepildik berilgen qyzmetterdi naqtylaýǵa, júıeniń ashyqtyǵyn qamtamasyz etýge jáne halyqqa kórsetiletin kómektiń qoljetimdiligin arttyrýǵa baǵyttalǵan, dep jazady Egemen.kz.
Zańnamalyq negiz
2024 jylǵy 2 qyrkúıekte jarııalanǵan Prezıdent Joldaýynda bıýdjet múmkindikteri men azamattardyń qajettilikterin eskere otyryp, memlekettik medısınalyq kómektiń biryńǵaı bazalyq paketin qalyptastyrý tapsyrylǵan bolatyn. Osyǵan sáıkes Densaýlyq saqtaý mınıstrligi medısınalyq kómekti qarjylandyrýdyń uzaq merzimdi turaqtylyǵyn qamtamasyz etý jáne halyq úshin medısınalyq qyzmetterdi tıimdi uıymdastyrý maqsatynda birqatar ózgeristerdi iske asyryp otyr.
Negizgi maqsattar
Biryńǵaı bazalyq paketke kezeń-kezeńimen kóshý arqyly kelesi mindetter sheshiledi:
Tegin medısınalyq kómektiń kepildik berilgen kólemi (TMKKK) men MÁMS arasyndaǵy qaıtalanatyn qyzmetterdi boldyrmaý;
Medısınalyq qyzmetter tizbesin naqtylaý jáne ashyqtyǵyn qamtamasyz etý;
Qyzmet kórsetýdiń sapasyn jáne qoljetimdiligin arttyrý;
Densaýlyq saqtaý júıesiniń qarjylyq turaqtylyǵyn nyǵaıtý;
Naqty saqtandyrý modeline birtindep kóshý.
Bul baǵyttaǵy negizgi jańashyldyqtardyń biri – aýrýlardyń aldyn alý jáne erte dıagnostıkaǵa erekshe nazar aýdarý. Máselen, 2026 jyldan bastap onkologııalyq aýrýlardy anyqtaýǵa arnalǵan skrınıngter barlyq azamattarǵa, saqtandyrý mártebesine qaramastan, qoljetimdi bolady.
Biryńǵaı paket sheńberinde kórsetiletin qyzmetter
Saqtandyrylmaǵan azamattar úshin de birqatar medısınalyq qyzmetter qoljetimdi bolyp qala beredi. Atap aıtqanda:
Emhana deńgeıinde alǵashqy medısınalyq-sanıtarııalyq kómekke júginý;
Vaksınasııa;
Onkologııalyq aýrýlarǵa skrınıngter;
Áleýmettik máni bar aýrýlarǵa kúdik týyndaǵan jaǵdaıda dıagnostıkalyq zertteýler;
Jedel jáne shuǵyl medısınalyq kómek;
Infeksııalyq aýrýlar kezinde emdeý;
Dıagnostıka, emdeý jáne aldyn alý sharalary (barlyq áleýmettik máni bar aýrýlar boıynsha tegin dárilik zattarmen qamtamasyz etý);
Qan komponentterimen qamtamasyz etý;
Pallıatıvtik kómek jáne uzaq merzimdi kútim.
Bul sharalar áleýmettik mártebesine qaramastan halyqtyń ál-aýqatyn arttyrýǵa baǵyttalǵan.
Halyqaralyq tájirıbe
Qazaqstandaǵy bastamalar halyqaralyq tájirıbege negizdelgen. Mysaly:
Reseıde tegin medısınalyq kómek paketi sanıtarııalyq avıasııany, AITV/JITS, týberkýlez, jynystyq jolmen beriletin ınfeksııalar men psıhıkalyq aýrýlardy qamtıdy.
Estonııada – jedel medısınalyq kómek, AITV/JITS, ınfeksııalar, týberkýlez jáne psıhıkalyq aýrýlar boıynsha qyzmetter kórsetiledi.
Lıtvada medısınalyq kómek tek jedel jaǵdaılarmen shektelgen.
Germanııa men Nıderlandyda bul qyzmetter negizinen meıirgerlik kútimdi qamtıdy.
Qarjylyq turaqtylyq
Biryńǵaı paketti qalyptastyrý barysynda Densaýlyq saqtaý mınıstrligi syrtqy sarapshylarmen birlese otyryp, barlyq medısınalyq qyzmetter men olardyń qunyn jan-jaqty taldaýdan ótkizdi. Bul tásil resýrstardy ońtaıly bólýge, medısınalyq qyzmetterdi qarjylandyrý tetikterin jetildirýge jáne júıeniń turaqtylyǵyn qamtamasyz etýge múmkindik beredi.
Biryńǵaı bazalyq paketke kóshý – halyq densaýlyǵyn qorǵaý baǵytynda qabyldanyp otyrǵan júıeli jáne mańyzdy qadam. Bul bastama medısınalyq qyzmetterdiń naqty qurylymyn qalyptastyryp, azamattarǵa kórsetiletin kómekti ashyq ári tıimdi etýge baǵyttalǵan. Densaýlyq saqtaý salasyndaǵy bul ózgeristerdiń basty maqsaty – sapaly, qoljetimdi jáne áleýmettik ádiletti medısınalyq qyzmet kórsetý.